Bilim jáne ǵylym ministri Ashat Aimaǵambetov halyqtyń tildik daǵdylaryn ólsheýge arnalǵan halyqaralyq reitingterge qatysty mán-jaidy tarqatty. Ol osy aqparat arqyly bilim salasyndaǵy halyqaralyq jáne ulttyq reitingtik júielerdiń nátijeleri týraly jazbalar toptamasyn bastaitynyn aitty, dep habarlaidy "Ult aqparat".
«2021 jyldyń sońynda BAQ-ta «Qazaqstan - aǵylshyn tilin meńgerý boiynsha aýtsaiderlerdiń biri» degen eleń etkizer taqyryppen maqala belsendi túrde tarala bastady. Biraq silteme EF EPI reitingine berildi.
Alaida nátijelermen qatar meni zertteý ádistemesiniń ózi qyzyqtyrdy.
EF EPI halyqaralyq reitingi (EF aǵylshyn tilin meńgerý indeksi) baǵalaýǵa keminde 400 adam qatysqan elderdiń aǵylshyn tilin meńgerý deńgeiin baǵalaidy. EF EPI aǵylshyn tilindegi EF SET testin óz betinshe jáne óz erkimen tapsyrǵan eresekterdiń derekteri negizinde elderdiń reitingin anyqtaidy. EF SET – kez kelgen internet paidalanýshysyna aqysyz qoljetimdi aǵylshyn tilindegi onlain-test. Bul testke myna silteme arqyly ótip, óz betińizshe tapsyra alasyz», - dep jazdy ministr Telegram paraqshasynda.
Onyń atap ótýinshe, bul reitingte til meńgerý deńgeii oqý jáne tyńdaý daǵdylary boiynsha, al IELTS, TOEFL-da tórt daǵdy boiynsha baǵalanady.
Sondai-aq, testileý syrtqy baqylaýsyz ótetindikten, reprezentativti úlgi joq, testilenýshiniń jeke basy sáikestendirilmeidi jáne test tapsyrý kezinde obektivtiliktiń saqtalýyna kepildik berilmeidi.
«Degenmen testileý qorytyndysy boiynsha 2020 jylǵy derektermen salystyrǵanda Qazaqstannyń ortasha baly 14 balǵa jaqsarǵany baiqaldy: eń joǵary 800 baldan 426 ball. Aita keteiik, Nur-Sultan 470, al Almaty 466 ball nátijelerin kórsetip, aǵylshyn tilin ortasha deńgeide meńgergen qalalar retinde baǵalandy. Osy aqparatqa súiene otyryp, ár adam kórsetilgen reitingtiń reprezentativtiligi jáne oǵan degen senim týraly sheshimdi ózi qabyldaýy kerek», - dedi ol.
Ministrdiń atap ótýinshe, basqa tildik emtihandardyń nátijeleri osy reiting siiaqty jariialanbaidy, biraq nátijeler de bar.
«Mysaly IELTS, TOEFL siiaqty tanymal test túrleri bar ekenin bári biledi. Bul tildik emtihandardyń joǵaryda atalǵan EF SET-ten aiyrmashylyǵy – barlyq tórt tildik daǵdyǵa jan-jaqty baǵa beredi: tyńdaý, oqý, jazý jáne sóileý. Sondai-aq IELTS jáne TOEFL emtihandary akademiialyq adaldyqtyń joǵary standarttaryn kórsetýimen EF SET-ten erekshelenedi. Óitkeni testileý kezinde qatysýshylar jeke basyn sáikestendirý rásiminen ótýge mindetti jáne testi ázirleýshiler ókilderiniń baqylaýymen test tapsyrady», - dedi Ashat Aimaǵambetov.
Onyń aitýynsha, Qazaqstan sońǵy úsh jylda halyqaralyq TOEFL iBT emtihanynyń nátijeleri boiynsha oń dinamika kórsetip júr.
Atap aitqanda, 2018 jyly – 82 ball, 2019 jyly – 85 ball, 2020 jyly 120 baldan 86 ball jinaǵan. Bul - Ortalyq Aziia elderi arasynda eń joǵary kórsetkish. CEFR Jalpyeýropalyq júiesindegi aǵylshyn tilin meńgerý deńgeilerine sáikes, bul kórsetkishter aǵylshyn tilin bilýdiń shekti nemese ortasha deńgeiine (B1) sáikes keledi. Iaǵni bul turmystyq jaǵdailarda tildesý múmkindigin nemese tanys taqyryptar boiynsha áńgimelesýge bolatynyn bildiredi.
Al, tildik daǵdylar bólinisinde qazaqstandyqtar tyńdaý jáne sóileý boiynsha ortasha eseppen árbir bólimdegi 30 eń joǵary baldan 22 ball, oqý jáne jazý boiynsha 21 ball jinaidy.
«Qazaqstandyqtardyń halyqaralyq IELTS emtihanyndaǵy nátijeleri erekshe qyzyǵýshylyq týdyrady. 2019 jyly azamattardyń aǵylshyn tilin meńgerý deńgeiiniń ortasha baly eń joǵary 9-dyń 6,1 balyn qurady. Iaǵni, bilikti paidalanýshy deńgeiine sáikes keledi. Bul qazaqstandyq úmitkerlerdiń keibir naqtylanbaǵan aqparatqa qaramastan, tildi jaqsy meńgergenin bildiredi. Olar kúrdeli tildi, ásirese tanys jaǵdailarda qoldanyp, túsine alady. Tildik daǵdylardyń túrleri boiynsha qazaqstandyqtar oqý jáne tyńdaý boiynsha aitarlyqtai joǵary nátije (6,3 baldan), al sóileý (6,0) men jazý (5,6 upai) boiynsha birshama tómen nátije kórsetip otyr. Keibireýler tańdanatyn shyǵar, biraq olar IELTS halyqaralyq emtihanyndaǵy jalpy ball boiynsha Qazaqstannyń Koreia (6,0), Qytai (5,8), Japoniia (5,8), Ózbekstan (5,7) jáne taǵy basqa kóptegen elden ozyp ketkenine qyzyǵa qaraityn bolady», - dep túiindedi ministr.
