Foto: Mohamed Azakir / Reuters
Qazaqstan Úkimeti bólgen 1 mln dollar BUU-nyń Taiaý Shyǵys agenttigine aýdaryldy. Bul týraly Syrtqy ister ministrliginiń resmi ókili Aibek Smadiiarov málimdedi, dep habarlaidy Sputnik Qazaqstan.
Onyń aqparatynsha, Batys, Aziia, Afrika jáne Taiaý Shyǵys elderi, atap aitqanda Parsy shyǵanaǵy Arab memleketteriniń yntymaqtastyq keńesi memleketteri, AQSh, Eýropa odaǵy, Kanada, Ulybritaniia, Japoniia, Resei, Qytai, Túrkiia jáne basqalary Gaza sektorynda jáne Iordan ózeniniń batys jaǵalaýynda zardap shekken Palestina halqyna qarjylyq jáne materialdyq gýmanitarlyq kómek kórsetý týraly sheshim qabyldaǵan.
"Gaza sektoryndaǵy apatty gýmanitarlyq jaǵdaidy eskere otyryp, Qazaqstan da shet qalmaýǵa jáne Palestina halqyna 1 mln AQSh dollary kóleminde gýmanitarlyq kómek kórsetýge sheshim qabyldady. Bul sheshimdi Túrki memleketteri uiymynyń onynshy sammiti barysynda Qazaqstan prezidenti jariialady. Qazaqstan úkimeti bólgen qarajat BUU-nyń Taiaý Shyǵys agenttigine aýdaryldy. Uiym Palestina halqyna jeti onjyldyq boiy tótenshe jáne basqa da kómek kórsetetin jumystardy uiymdastyryp keledi", - dedi Smadiiarov apta saiynǵy brifingte.
SIM resmi ókili gýmanitarlyq qyzmet elimizdiń syrtqy saiasatynyń mańyzdy baǵytynyń biri ekenin atap ótti.
"Beibit saiasat pen ádildik qaǵidattaryn ustanatyn Qazaqstan árdaiym qiyn gýmanitarlyq jaǵdaiǵa tap bolǵan memleketterge qoldaý kórsetýge umtylady", - dedi Smadiiarov.
SIM aqparatynsha, biyl 7 qazanda bastalǵan palestinalyq HAMAS qozǵalysy men Izrail arasyndaǵy qarýly qaqtyǵys Gaza sektorynda apatty gýmanitarlyq daǵdarys týdyrdy. Sońǵy málimetter boiynsha qaqtyǵys saldarynan Gaza sektorynda 10 myńǵa jýyq adam qaza taýyp, 20 myńnan astam adam jaraqat alǵan. Sonymen qatar qurbandardyń úshten ekisi – áielder men balalar.
BUU Taiaý Shyǵys agenttiginiń aqparatyna sáikes, Gaza sektoryndaǵy halyqtyń jaǵdaiy óte kúrdeli jáne eki millionnan astam adam azyq-túlik kómegine muqtaj.
