Saqtandyrý shyǵyndary memleket esebinen sýbsidiialanatyn túliktiń qataryn qoi men jylqy tolyqtyratyn boldy. Buǵan deiin tek múiizdi iri qara basyn saqtandyrý shyǵyndaryna biýdjetten sýbsidiia tólenetin, dep habarlaidy "Ult aqparat".
«Naryqqa usaq mal men jylqy basyn tolyq saqtandyrýdy qamtamasyz etetin jańa ónimder engizildi. Oǵan barlyq yqtimal táýekelder kiredi jáne saqtandyrýdyń quny salystyrmaly túrde tómen», - dep jazylǵan Aýyl sharýashylyǵy ministrligi baspasóz qyzmetiniń málimetinde.
Mundaǵy «táýekelderdiń bári dep otyrǵany» – indet, órt, jazataiym oqiǵa siiaqty adam erkinen tys bolatyn tosyn jaittar. Sondai-aq, ury soiyp áketkeni dáleldense de, iz-túzsiz joǵalyp ketse saqtandyrý arqyly shyǵyndy ótep alý tetigi usynylady.
«Burynǵy tásil boiynsha fermer malyn óz sharýashylyǵynyń aýmaǵynda ǵana túrli táýekelderden saqtandyra alatyn. Al usynylyp otyrǵan júie boiynsha saqtandyrý aýqymy 5 shaqyrym radiýstaǵy aýmaqqa túgel júredi», - deligen resmi málimette.
Mundaǵy basty talaptyń biri – saqtandyrylatyn maldyń sany 30-dan kem bolmaýy kerek. Saqtandyrýǵa jatatyn túlik sany kóbeigen saiyn tarif te ózgerip otyrady. Mysaly jylqyǵa 2,31 –6,46% aralyǵynda, usaq malǵa 2,38 – 6,16% aralyǵynda tarif usynylady.
Eń bastysy, mal basyn saqtandyrýǵa tólengen qarajattyń teń jartysyn memleket sýbsidiialaidy. Iaǵni, saqtandyrý shartyn jasasqan kezde fermer sharttaǵy baǵanyń jartysyn ǵana tóleidi. Qalǵan bóligin Aýyl sharýashylyǵyn qarjylai qoldaý qory bóledi» - deidi qordyń basqarýshy direktory Asqar Qaliev.
Mal basyn saqtandyrý naryǵyn alaiaqtardan taza ustaý úshin bul iske Qarjy naryǵyn retteý jáne damytý jónindegi agenttigi bergen litsenziiasy bar kompaniialardyń ǵana jumys isteýine ruqsat etilip otyr.
Saqtandyrýmen bailanysty qujattar men qarjylyq operatsiialardyń bárin elektrondy tsifrlyq qoltańba arqyly Qoldau.kz platformasyndaǵy Agroinsurance aqparattyq servisinde júrgizýge bolady.
Bul júiede saqtandyrylǵan maldyń aýrýǵa shaldyǵý deregi, oǵan iesiniń qandai emdik sharalar qoldanǵany týraly málimetter de engizilip otyrady.
