Foto: primeminister.kz
Úkimet basshysynyń orynbasary Serik Jumanǵarin Úkimette Bloomberg agenttiginiń maqalasyna qatysty pikir bildirdi, dep habarlaidy Kazinform agenttigi.
Bloomberg agenttigi Frantsiia Prezidenti Emmaniýel Makronnyń Qazaqstanǵa sapary jóninde «Makron ýran men jańa dostaryn tabý úshin Pýtinniń artqy aýlasyna keldi» (Macron Lands in Putin’s Backyard Seeking New Friends and Uranium) maqalasyn jariialaǵan edi.
Qazaqstandyqtar ondaǵy «Backyard» sózin «artqy aýla» nemese «qora» dep aýdaryp, agenttikke shúilikken.
«Qazaqstan eshkimniń artqy aýlasy emes, bul – táýelsiz memleket, kóp jyldyq tarihy bar Máńgilik el. Jaqynda Túrkistanda úkimetaralyq komissiia ótkizip, reseilik áriptesterimdi shaqyrǵan edim. Osydan keiin Qoja Ahmet Iassaýi kesenesine bardyq. Ekskýrsiia jetekshisi Aqsaraida sol kezdegi hannyń I Petr elshilerin qabyldaǵanyn aityp berdi. Sonda reseilik áriptesterim Qazaqstan tarihy týraly eshteńe bilmeitinin moiyndady. Biz Túrkistan men Máskeý arasynda tikelei reis ashýǵa ýaǵdalastyq. Kerýen saraidaǵy 8 D formattaǵy ushatyn teatrdy kórsettik. Munda qandai artqy aýla týraly sóz bolýy múmkin? Kim kimniń aýlasy? Bári bos áńgime», - dep jaýap berdi Jumanǵarin tilshi suraǵyna.
Sonymen birge, vitse-premer Qazaqstannyń EAEO-ǵa músheligi jóninde áńgimeledi. Eýraziia keńistiginde kóptegen másele sheshilip jatqanyn jetkizdi.
«Qazaq Air áýe jelisi Cheliabi men Novosibirge ashylyp jatyr. Munyń bizge ne jamandyǵy bar? Bizdiń shikizatymyz batysqa jańa ótkizý pýnktteri arqyly ótedi dep kelistik. Endi Resei Baltyq porttary arqyly bizdiń kómirge jeńildikterdi qarastyryp jatyr. Qosymsha tórt ótkizý pýnktin ashýǵa jáne bolashaqta barlyq shekteýdi alyp tastaýǵa kelisip otyr. Kórip otyrǵanyńyzdai, bul bizdiń kúndelikti saýda-ekonomikalyq qyzmetimizdiń praktikalyq máseleleri. Bir elden bir nárseni kóbirek satyp alatynymyz bireýdiń «aýlasy» ekendigimizdi bildirmeidi. Bizge kerek bolǵan soń, satyp alamyz. Bul turǵyda eshkim bir qadam artqa sheginbeidi. Bizdiń ókilderimizdiń arasynda aýla da, tómen deńgeili adamdar da joq», - dep túiindedi Jumanǵarin.
