BUU-nyń elektrondyq úkimetti damytýdyń jahandyq reitinginde Qazaqstan 29-orynǵa kóterildi, dep habarlaidy "Ult aqparat" Tsifrlyq damý, innovatsiialar jáne aeroǵarysh ónerkásibi ministrligine silteme jasap.
«28-orynǵa Kanada ie boldy. Bul reiting ár 2 jyl saiyn jasalady jáne BUU-ǵa múshe 193 eldiń kórsetkishteri baǵalanady. 2020 jylǵy reiting memleketterdiń 2018-2019 jyldary júrgizgen jumysynyń nátijesine negizdelgen.
BUU-nyń jariialaǵan esebine sáikes, elektrondyq úkimetti damytý boiynsha kóshbasshylardyń alǵashqy úshtigine Daniia, Ońtústik Koreia jáne Estoniia endi», delingen habarlamada.
TMD elderi arasynda Qazaqstan 1-oryndy ielendi. Qazaqstannan keiin Resei (36), Belarýs (40), Ýkraina (69), Moldova (79), Ózbekstan (87)jáne t.b.elder ornalasqan.
Osy jylǵy reitingide Portýgaliia 35-shi, Italiia 37-shi, Belgiia 41-shi, Qytai 45-shi, Malaiziia 47-shi orynda tur.
Qazaqstannyń atalǵan reitingtegi eń joǵary pozitsiiasy 28-oryn 2014 jyly tirkelgen edi. 2016 jyly 33-orynǵa, al 2018 jyly 39-orynda boldy. Osylaisha, sońǵy 2 jyldaǵy kórsetkish boiynsha Qazaqstan10 pozitsiiaǵa joǵarylady.
Elektrondyq úkimetti damytý boiynsha BUU-nyń jahandyq reitinginde (EGDI) úsh komponent negizge alynady: elektrondyq qyzmetterdi (OSI), adami kapitaldy (HCI), telekommýnikatsiialyq infraqurylymdy damytý (TII).
«2018 jylǵy kórsetkishpen salystyrǵanda elektrondyq úkimetti damytý indeksi (EGDI) 2020 jyly 10.2%-ǵa, onlain qyzmetter boiynsha 6,38%-ǵa, adami kapital boiynsha 5.6%-ǵa ósti.
Joǵary 22.7% kórsetkish telekommýnikatsiialyq infraqurylymdy damytý salasynda baiqaldy. Sonymen qatar, elektrondyq qyzmetter deńgeii boiynsha Qazaqstan eń joǵary ball aldy. Reitingte bul kórsetkish 1% dep baǵalansa, Qazaqstannyń kórsetkishi 0,92% dep baǵalandy», delingen habarlamada.
Elektrondyq úkimetti qoldanýdy damytý boiynsha (E-participation) Qazaqstan 16 pozitsiiaǵa kóterilip, 26-orynǵa shyqty. Bul indeks azamattardyń sheshim qabyldaý protsesine qatysýyn, memleket qyzmetiniń ashyqtyǵyn kórsetedi, bul «estýshi memleket» saiasatyna sáikes keledi.
Jergilikti jerlerde onlain-qyzmetterdi damytý boiynsha Almaty qalasy reitingige qatysqan álemdegi 100 qalanyń ishinde 29-orynda.
