Qazaqstannyń ekonomikalyq qurylymynyń tórtten bóligin ónerkásip salasy qurap otyr. Bul týraly QR Indýstriia jáne infraqurylymdyq damý ministri Beibit Atamqulov málim etti, dep habarlaidy QazAqparat.
«Ózderińiz biletindei, ónerkásip salasy bizdiń elimizdiń ekonomika qurylymynyń tórtten bóligin (27,1%) quraidy. Al ónerkásiptiń ishinde óńdeýshi sala jartysyna jýyǵyn alyp, 2020 jyly sońǵy 20 jylda alǵash ret eń joǵary kórsetkish 48,7%-ǵa (2001 j. - 46,2%) jetti. Óńdeýshi ónerkásiptiń jalpy ishki ónimdegi (JIÓ) úlesi 2020 jyly 12,7%-dy qurady. Indýstriialandyrý jyldarynda engizilgen jańa kásiporyndar óńdeý ónerkásibi óndirisi kóleminiń ósýine yqpal etti», - dedi Beibit Atamqulov Senatta ótip jatqan «QR ónerkásiptik saiasatty zańnamalyq retteý: jai-kúii, problemalary jáne sheshý joldary» taqyrybyndaǵy Úkimet saǵatynda.
Onyń aitýynsha Indýstriialandyrý kartasy aiasynda 2010-2020 jyldary shamamen 9,1 trln teńge somaǵa 1527 joba iske qosylǵan. 212 myń jumys orny qurylyp, 28,8 trln teńgeniń ónimi shyǵarylǵan. Kásiporyndar ótken jyly 13 trln teńgege ónimin óndirgen.
«Indýstriialandyrý bastalǵannan beri (2010-2020 jj.) barlyǵy 84,5 trln teńgeniń ónimi óndirildi. Osy jyldar ishinde óńdeýshi sektor kásiporyndarynan túsetin salyqtar jiyntyǵy 9 trln teńgeden asyp, 3 ese derlik ósti. Bul búginde óńdeýshi ónerkásipten túsetin salyqtar indýstriialandyrý saiasatyn iske asyrýǵa jumsalǵan shyǵyndardan 6,6 ese kóp ekenin bildiredi», - dedi ol.
