Qazaqstan ekonomikasy qalpyna kelýin jalǵastyryp keledi jáne biylǵy jyldyń 7 aiynda 2,7 paiyzǵa ósti. Bul týraly Úkimet otyrysynda QR Ulttyq bank tóraǵasy Erbolat Dosaev málim etti, dep habarlaidy QazAqparat tilshisi.
«Syrtqy jaǵdailardyń jaqsarýy, qoldanystaǵy fiskaldyq yntalandyrý jáne ótken jyldyń tómen bazasy aiasynda ulttyq ekonomikany qalpyna keltirý jalǵasýda. Álemdik ekonomikanyń budan bylaiǵy damý qarqyny koronavirýstyń delta shtamynyń taralý táýekelderine jáne damýshy elderdegi vaktsinatsiianyń tómen qarqynyna bailanysty bolyp otyr. Memleket basshysynyń daǵdarysqa qarsy bastamalarynyń arqasynda Qazaqstan ekonomikasy qalpyna kelýin jalǵastyrýda jáne biylǵy jyldyń 7 aiynda
2,7 paiyzǵa ósti. Osy jyldyń qorytyndysy boiynsha Ulttyq bank ishki jalpy ónimniń 3,7%-ǵa ósýimen daǵdarysqa deiingi deńgeige qaita oralýdy kútýde», - dedi E. Dosaev.
Onyń aitýnysha, Úkimet pen Ulttyq banktiń makroekonomikalyq turaqtylyqty qamtamasyz etý jónindegi birlesken sharalaryn iske asyrý Qazaqstan ekonomikasyndaǵy oń ózgeristerge qol jetkizýge múmkindik berdi, ony halyqaralyq reiting agenttikteri rastap otyr. Qazaqstannyń táýelsiz reitingi Moody's agenttigi tarapynan 2006 jyldan bastap alǵash ret «Baa2» deńgeiine deiin kóterildi, sondai-aq Fitch agenttigi tarapynan «BBB» deńgeiinde rastaldy, eki jaǵdaida da turaqty boljamǵa ie boldy.
«Joǵaryda aitylǵandar negizinde Ulttyq bank Áleýmettik-ekonomikalyq damýdyń 2022-2026 jyldarǵa arnalǵan boljamy úshin negizgi aqsha-kredit saiasaty jáne tólem balansy kórsetkishteriniń boljamyn jańartty», - dedi UB basshysy.
