Qazaqstan biýdjeti 1 dollar 350 teńgemen eseptelinedi. Bul týraly búgin Úkimettiń selektorlyq rejimdegi otyrysynan keiin QR Ulttyq ekonomika ministri Timýr Súleimenov aitty, dep habarlaidy QazAqparat tilshisi.
Aita keteiik, Úkimet otyrysynda ministrler 2019-2023 jyldarǵa arnalǵan Qazaqstannyń áleýmettik-ekonomikalyq damý boljamyn, sonymen qatar 2019-2021 jyldarǵa arnalǵan respýblikalyq biýdjet týraly jáne 2019-2021 jyldarǵa arnalǵan QR Ulttyq qorynan kepildendirigen transfert týraly QR Zańdarynyń jobasyn talqylaǵan edi.
«Taiaý jylǵa munaidyń bir barrelin 60 dollarmen bekitemiz. Ózderińiz de biletindei, bizde bul kórsetkish syrǵymaly negizde. Iaǵni, bul parametrlerdi qaita qarastyrýǵa múmkindigimiz bar. Baǵamǵa keler bolsaq, biz baǵamdy boljamaimyz... Biýdjet jobasyn qalyptastyrý úshin qoldanatyn baǵam kelesi jylǵa bir dollar úshin 350 teńge bolady», - dedi ol BAQ ókilderine.
Onyń sózine qaraǵanda, biýdjette túbegeili ózgerister bolmaidy.
«Biýdjet ádettegidei áleýmettik baǵytqa baǵdarlanǵan. Shyǵystardyń basym bóligi árbir qazaqstandyqtyń ómir deńgeiin qoldaýǵa baǵyttalǵan. Biýdjettiń damý bóligi de bar. Ol agroóenrkásip keshenin, shaǵyn jáne orta biznesti damytýdy kózdeitin memlekettik baǵdarlamalarǵa baǵyttalanatyny túsinikti. Iaǵni, túbegeili ózgerister bola qoimaidy», - dedi Timýr Súleimenov.
