Foto: Parlam.kz
Búgin Parlament palatalarynyń birlesken otyrysynda BUU missiialaryna jiberiletin áskeri qyzmetshiler arasyndaǵy áielder sanyn kóbeitýge qatysty túsinik berildi, dep habarlaidy Kazinform.kz agenttigi.
«Genderlik máselelermen ainalysatyn BUU-nyń departamenti áielderdi bitimgerlikke qatystyrýdy eskeretin birqatar argýmentti ázirledi. Olardyń ishinde bitimger áielder jergilikti áielderdiń toptarymen jaqsy qarym-qatynas ornata alady jáne qaýipsizdikke qatysty barlaý derekterin jinaýdy jaqsartady degen dálel keltirgen. Osy oraida BUU bólimshedegi áielder sanyn 30 paiyzǵa deiin arttyrý týraly talap qoidy. Qazaqstan bul talapty saqtaýdy óz mindetine ala ma? BUU missiialaryna jiberilgen áskeri qyzmetshiler arasynda neshe áiel bar?», - dep surady senator Aigúl Qapbarova.
Óz kezeginde Qorǵanys ministri Rýslan Jaqsylyqov qazir Batys Saharada bir áiel ofitser bar ekenin aitty.
«Jiberiletin áskeri kontingentte 7 áiel bolady. Kelesi rotatsiiada áielder sanyn kóbeitemiz», - dedi ministr.
Olardyń arasynda dárigerler, aýdarmashylar, tehnikalyq qyzmetkerler qamtylady.
Budan buryn habarlanǵandai, búgin Parlament qazaqstandyq áskerilerdiń BUU missiialaryna qatysýy týraly Joldaýyn maquldady.
