BUU Bas Assambleiasynyń 76-shy sessiiasy barysynda Qazaqstan Respýblikasy 2022–2024 jyldarǵa BUU Adam quqyqtary jónindegi keńesiniń múshesi bolyp sailandy, dep habarlaidy "Ult aqparat" Syrtqy ister ministrliginiń baspasóz qyzmetine silteme jasap.
Qazaqstan Keńestegi jumysynyń basym baǵyttary genderlik teńdikti ilgeriletý jáne áielderdiń quqyqtary men múmkindikterin keńeitý, ólim jazasyn jappai joiý, tózbeýshiliktiń barlyq nysandaryna qarsy kúres, din men senim bostandyǵy, inkliýzivti jáne jalpyǵa birdei bilim berýdi qamtamasyz etý, sondai-aq COVID-19 pandemiiasy jaǵdaiynda adam quqyqtaryn qurmetteý bolady.
Elimizdiń dúniejúzilik uiymnyń bas quqyq qorǵaý organyna sailanýy onyń Adam quqyqtary men bostandyqtaryn qorǵaý salasyndaǵy halyqaralyq normalar men standarttardy ilgeriletý protsesine belsendi jáne jaýapty qatysýshy retindegi rólin moiyndaý bolyp tabylady.
Qazaqstanmen birge BUU Adam quqyqtary jónindegi keńesiniń quramyna AQSh, Liýksembýrg, Finliandiia, Litva, Chernogoriia, Argentina, Gondýras, Paragvai, Benin, Kamerýn, Eritreia, Gambiia, Somali, Úndistan, Malaiziia, Qatar jáne Birikken Arab Ámirlikteri kirdi.
Buǵan deiin elimiz Adam quqyqtary jónindegi keńeske 2013–2015 jyldary sailanǵan bolatyn.
Adam quqyqtary jónindegi keńes – BUU júiesiniń úkimetaralyq organy, onyń quramyna álemdegi adam quqyqtaryn kótermeleýge jáne qorǵaýǵa jaýapty 47 memleket kiredi. Keńes quzyretine onyń nazaryn talap etetin adam quqyqtary salasyndaǵy barlyq taqyryptyq máseleler men jaǵdailardy talqylaý kiredi. Keńes músheleri bes óńirlik toptan sailanady jáne óz mindetterin úsh jyl boiy atqarady. Adam quqyqtary jónindegi keńestiń otyrystary BUU-nyń Jenevadaǵy bólimshesinde ótedi.
