«Almaty» olimpiadalyq daiarlaý ortalyǵy direktorynyń orynbasary, AIBA Halyqaralyq federatsiiasy komissiiasynyń múshesi Ermahan Ybyraiymov bokstan ulttyq quramaǵa qandai kerek ekenin aityp berdi, dep habarlaidy QazAqparat.
«Ermahan myrza, bokstan ulttyq qurama basshylyǵyna kelsem, kóp nárse ózgerter edim depsiz. Eger basshylyqqa kelseńiz, ózgeristi neden bastaisyz?» degen suraq qoiyldy boksshyǵa Ortalyq kommýnikatsiialar qyzmetinde.
«Men 2002-2004 jyly bas bapker qyzmetinde bolǵanmyn. Ol kezde Baqtiiar Artaev Olimpiada chempiony boldy, Gennadii Golovkin «kúmis», Serik Eleýov «qola» medal ielengen edi. Úsh medal boldy. Ár Olimpiada oiynynda Qazaqstan boksshylary 3-4 medal alyp kele jatyr. Biraq, esterińizde bolsa 2008 jyly Qazaqstan qorjynyna eki-aq medal salyndy. Baqyt Sársekbaev pen Erkebulan Shynáliev «altyn» jáne «qola» júlde aldy. Kóptegen jankúierlerimiz áleýmettik jelide kóptegen áńgime aityp jatyr. Sondyqtanbarlyq jankúierlerdi sabyrǵa shaqyramyn. Qalǵan tórt boksshymyzdyń bári medal ákelse, bul áńgimeniń bári artta qalar edi. Sondyqtan, tórt boksshymyzǵa senim mol», - dedi E. Ybyraiymov.
Sonymen birge, spiker Qazaqstan boksyna taktikalyq turǵyda ózgerister engizý kerektigin aitty.
«Bizdiń boksshylar aldyńǵy qolmen múldem jumys istemeidi. Tek kúshtirek qolyna senedi, oń bolsa oń qolmen, solaqai bolsa – sol qolymen qatty soqqy jasaidy. Biraq qashyqty saqtamaidy. Londondaǵy Serik Sápievtei, Afinadaǵy Baqtiiar Artaevtai jaqsy oiyn kórsete almai jatyr. Sondyqtan bul jerde taktikalyq turǵydan búkil boksshyǵa ózgeris kerek. Aiaqpen qorǵanys jasaý degen uǵym bar. Muhamed Áli aitqandai, kóbelek tárizdi ushyp-qonyp, ara siiaqty shaǵý kerek. Sondai boksshyny qazir kórmei otyrmyn. Áli de jigitterge aitarym, aiaqpen jumys isteńizder, qashyqty saqtap, qaitadan jetip baryp, qorǵanys jasaý kerek. Sondai ózgerister engizer edim», - dedi Ermahan Ybyraiymov.
