QR Premer-Ministri Asqar Maminniń tóraǵalyǵymen ótken Úkimet otyrysynda Dúniejúzilik banktiń «Doing Business» reitingindegi jáne basqa da halyqaralyq reitingterdegi Qazaqstannyń pozitsiialaryn jaqsartý sharalary qaraldy, dep habarlaidy "Ult aqparat" primeminister.kz saityna silteme jasap.
QR ulttyq ekonomika ministri R. Dálenov «Doing Business» biznesti júrgizý jeńildigi reitinginde Qazaqstan 2019 jyly álemniń 140 eliniń ishinde 28-oryndy alǵanyn atap ótti.
«Biz ózimizdiń aldymyzǵa 2025 jyly alǵashqy jiyrma eldiń qataryna kirýge maqsat qoiyp otyrmyz. Búgingi kúni bul Finliandiia, Avstraliia jáne Latviia sekildi elderdiń deńgeii», — dedi ulttyq ekonomika ministri.
Qazaqstannyń óńirleri bólinisinde, biznesti júrgizý jaǵdailary boiynsha Almaty, Aqtaý jáne Aqtóbe qalalary kósh bastap tur.
R. Dálenovtyń aitýynsha, saýda jáne kólik infraqurylymynyń damý deńgeii Dúniejúzilik banktiń LPI (Logistics Performance Index) reitingimen ólshenedi. Indeks elderdiń saýda logistikasyn damytýdaǵy syn-qaterler men múmkindikterin aiqyndaýǵa járdemdesedi.
«Qazaqstan bul reitingte 2018 jyldyń qorytyndysy boiynsha 71-oryndy ielendi. Elimiz 2025 jylǵa qarai top-40 eldiń qataryna kirýi qajet. Olar – Izrail, Islandiia, Malaiziia sekildi elder», — dedi R. Dálenov.
Jahandyq básekege qabilettilik indeksin Dúniejúzilik ekonomikalyq forým esepteidi. Bul reitingte Qazaqstan 2018 jyldyń qorytyndysy boiynsha 59-orynǵa ie boldy. 2025 jylǵa qarai elimiz alǵashqy 40 eldiń qataryna kirýi tiis. Bul Italiia, Estoniia, Chili siiaqty elderdiń deńgeii.
«Jahandyq básekege qabilettilik indeksinde kedendik resimdeýdiń tiimdiligin ólsheitin quramdaýyshty erekshe atap ótý kerek. Bul faktor boiynsha Qazaqstan 64-orynda. 2025 jylǵa qarai alǵashqy 40 eldiń qataryna kirýimiz qajet. Bul Izrail, Chehiia, Chili siiaqty elderdiń deńgeii», — dedi R. Dálenov.
Budan ózge, ulttyq ekonomika ministriniń aitýynsha, investorlar bilim berý deńgeiine erekshe nazar aýdarady. Bul orta jáne joǵary bilim daiyndyǵynyń deńgeii. Ekonomikalyq yntymaqtastyq jáne damý uiymy elderiniń arasynda negizgi indikator «PISA» — bilim alýshylardy baǵalaý halyqaralyq baǵdarlamasy. Atalǵan reiting mektepte bilim berý sapasyn úsh pán boiynsha ólsheidi: matematika, jaratylystaný, oqý. Reiting árbir 3 jylda qalyptastyrylady. 2018 jyldyń qorytyndysy boiynsha reiting aǵymdaǵy jylǵy jeltoqsan aiynda jariialanatyn bolady.
R. Dálenovtyń aitýynsha, egemen kredittik reitingter investorlar úshin barynsha mańyzdy faktor bolyp tabylady. Bul reitingterdi Standard&Poor’s, Moody’s i Fitch siiaqty agenttikter jasaidy. Aǵymdaǵy jylǵy tamyz aiynda atalǵan reitingtik agenttikter óz reitingilerin rastady (BBB-/Baa3/BBB). Bul rette Moody’s «turaqty» boljamyn «pozitivti» boljamyna jaqsartty.
«Búgingi tańda Qazaqstannyń egemen kredittik reitingi baǵalaýdyń «investitsiialyq» sanatyna kiredi, biraq táýekel deńgeii «ortasha» dep sipattalady. 2025 jylǵa qarai elimizge táýekel deńgeii tómen elderdiń sanatyna aýysý qajet. Bul A deńgeiindegi kredittik reiting. Bul topqa Chili, Japoniia, Polsha siiaqty elder kiredi», — dedi R. Dálenov.
Atalǵan reitingke qol jetkizý úshin elimizge ekonomika qurylymyn ártaraptandyrý, bank sektoryn saýyqtyrý, biýdjet tártibin kúsheitý qajet.
Bekitilgen Is-sharalar josparyn oryndaý monitoringin Úkimettiń Jobalyq ofisiniń jumysy sheńberinde júzege asyrý usynylady.
