Qazaqstan biyl 25,5 mln tonna tranzittik júkti tasymaldaidy. Bul týraly halyqqa esep berý kezdesýinde QR Indýstriia jáne infraqurylymdyq damý ministri Beibit Atamqulov aitty, dep habarlaidy "Ult aqparat".
«Kólik salasynyń negizgi mindeti - eldiń tranzittik áleýetin iske asyrý úshin ulttyq kólik júiesin álemdik kólik jelisine integratsiialaý. Jalpy sala qarqyndy damyp kele jatqanyn atap ótkim keledi. Árine, pandemiia kólik salasyna úlken ózgerister engizdi. Kóliktiń barlyq túrleri, onyń ishinde jolaýshylar da, júk tasymaly da zardap shekti», - dedi ministr.
Máselen, onyń atap ótýinshe, 2021 jylǵy qańtar-sáýir ailarynda kólik salasynyń jalpy qosylǵan qunynyń naqty kólem indeksi ótken jyldyń kórsetkishmen salystyrǵanda 91 paiyzdy qurady.
Kóliktiń barlyq túrimen júk tasymaldaý kólemi 1,07 mlrd tonna boldy.
«Pandemiiaǵa qaramastan, biz tranzittik júk tasymaldaýdyń turaqtylyǵy men tiimdiligin kórsete aldyq. Mysalǵa, 2021 jyldyń alǵashqy 4 aiynda tranzittiń jalpy kólemi 7,3 mln tonnany qurady. Bul óz kezeginde ótken jyldyń kórsetkishinen 4,1 paiyzǵa artyq. Onyń ishinde 337 myń konteiner jiyrma fýttyq ekvivalent tasymaldandy. Bul 2020 jylmen salystyrǵanda 52 paiyzǵa artyq. Biyl 25,5 mln tonna kóleminde tranzittik júk, onyń ishinde 1 mln jiyrma fýttyq ekvivalenttegi tranzittik konteiner tasymaldaý josparlanyp otyr», - dedi Beibit Atamqulov.
