QR Parlamenti Senatynyń jalpy otyrysynda «Qazaqstan men Mońǵoliia arasyndaǵy sottalǵan adamdardy berý týraly shartty ratifikatsiialaý týraly» Zańy qabyldandy, dep habarlaidy QazAqparat.
Shartqa 2018 jyly naýryzda Nur-Sultan qalasynda qol qoiyldy.
«Qujat eki memleket arasynda sottalǵan adamdardy jazasyn odan ári óz el elinde óteý úshin olarmen almasý múmkindigimen bailanysty máselelerdi retteidi. Shartpen adamdy berýdiń naqty jaǵdailary qarastyrylǵan», - dedi QR Bas prokýrorynyń orynbasary Bolat Dembaev.
Atap aitqanda, sottalǵan adam qabyldaýshy taraptyń azamaty bolýy tiis. Sonymen qatar, jasalǵan áreket eki jaqtyń zańy boiynsha qylmys dep sanalýy, ótelmegen jaza keminde bir jyldy quraýy kerek.
Belgili bolǵandai, shart talaptaryn iske asyrý úshin ortalyq organdar aiqyndaldy. Osy oraida QR Bas prokýratýrasy men Mońǵoliianyń Ádilet jáne ishki ister ministrliginiń ózara is-qimyly eskerilgen.
Budan bólek, sottalǵandardy berýden bas tartý negizderi de kózdelgen. Mysaly, el egenmendigine, qaýipsizdigine, qoǵamdyq tártipke nuqsan keltiretin bolsa, ulttyq zańnamanyń irgeli qaǵidattaryna qaishy keledi.
B. Dembaevtyń aitýynsha, qazirgi tańda Mońǵoliiada jazasyn ótep jatqan Qazaqstan azamattary joq. Al elimizde Mońǵoliianyń 5 azamaty jazasyn ótep jatyr.
«Osyǵan uqsas shartty elimiz 21 memleketpen bekitken. Jaqynda osyndai qujatqa Ózbekstan, Vetnam, Kipr, Dominikan jáne basqa da eldermen qol qoiý josparlanǵan», - dedi Bas prokýrordyń orynbasary.
