Premer-Ministrdiń orynbasary Roman Skliar Qazaqstan-Belarýs saýda-ekonomikalyq yntymaqtastyq jónindegi úkimetaralyq komissiianyń XV otyrysyna qatysty. Bul týraly "Ult aqparat" primeminister.kz silteme jasap habarlaidy.
Qazaqstan Respýblikasy Premer-Ministriniń orynbasary Roman Skliar jáne Belarýs Respýblikasy Premer-Ministriniń birinshi orynbasary Aleksandr Týrchin bastaǵan otyrystyń barysynda Qazaqstan Respýblikasy men Belarýs Respýblikasyndaǵy ekonomikalyq ahýal týraly aqparat almasý boldy, sondai-aq Qazaqstan-Belarýs saýda-ekonomikalyq yntymaqtastyǵynyń aǵymdaǵy jai-kúii men damý perspektivalary talqylandy.
Atap aitqanda, taraptar ÚAK XIV otyrysynyń Hattamasyn iske asyrý, eki eldiń Úkimetteri arasyndaǵy yntymaqtastyqty damytýdyń 2019-2020 jyldarǵa arnalǵan is-sharalar josparyn iske asyrý bóligindegi ýaǵdalastyqtar men usynymdar týraly, Qazaqsan men Belarýs arasyndaǵy saýda-ekonomikalyq yntymaqtastyq jáne ony keńeitý perspektivalary týraly, ónerkásiptik kooperatsiia men tehnikany jetkizý salasyndaǵy, aýyl sharýashylyǵy men azyq-túlik ónerkásibi salasyndaǵy, densaýlyq saqtaý salasyndaǵy yntymaqtastyq týraly, mádeni-gýmanitarlyq saladaǵy, ǵylym, tehnologiialar men bilim salalaryndaǵy, ǵarysh qyzmeti salasyndaǵy yntymaqtastyq týraly, sondai-aq 2020 jyly Belarýs aýmaǵynda josparlanǵan Úkimetaralyq komissiianyń XVI otyrysyn ótkizý týraly kelisti.
Otyrystaǵy sózinde Roman Skliar, qabyldanǵan sheshimder Qazaqstan ‒ Belarýs yntymaqtastyǵynyń barlyq baǵyttary boiynsha ekijaqty qatynastardyń damýyna qosymsha túrtki beretinine, sondai-aq kezekti ret Qazaqstan men Belarýs Respýblikasy arasyndaǵy dialogtyń qarqyndylyǵynyń biik deńgeiin kórsetetinine senim bildirdi.
Sonymen qatar, Roman Skliar eki elde jańa óndirister paida bolyp, Qazaqstan men Belarýs bir-birine halyqaralyq standarttarǵa sai jáne halyqaralyq sapa sertifikattary bar joǵary sapaly óńdelgen ónimdi básekelestik baǵa boiynsha jetkize alatynyn atap ótti. Osymen, biznesti júrgizý úshin jasalyp jatqan jaǵdailar bizdiń elderdi kásipkerler men investorlar úshin tartymdy qylýǵa múmkindik berdi.
Búgingi kúnde Qazaqstanda Belarýstyń qatysýymen 340-tan astam zańdy tulǵalar, filialdar men ókildikter jumys jasaidy. Osy jaǵdaida ÚAK mindeti – kásiporyndar men biznes-seriktesterdiń ózara tiimdi jáne tabysty yntymaqtastyǵy úshin qolaily jaǵdailar jasaý.
Óz kezeginde, Belarýs Respýblikasy Premer-Ministriniń birinshi orynbasary Aleksandr Týrchin ónerkásip, aýyl sharýashylyǵy, kólik, farmatsevtika, meditsina jáne AT salalaryndaǵy belarýstyq jáne qazaqstandyq kásiporyndardyń yntymaqtastyǵyn perspektivti dep aitty. Budan ózge, A. Týrchinniń aitýynsha óndiristik kooperatsiia yntymaqtastyqtyń basym baǵyttarynyń qatarynda qala beredi.
Aleksandr Týrchin birlesken ónerkásiptik, ǵylymi, injenerlik-tehnikalyq jáne kadrlyq áleýet kúrdeli jobalardy, sonyń ishinde óndiristerdi oqshaýlaýdyń joǵary dárejesimen iske asyrýǵa múmkindik beretinine senim bildirdi.
