Qazaqstan Qytaidyń Sinopharm kompaniiasy shyǵarǵan koronavirýsqa qarsy vaktsinanyń 4 mln dozasyn satyp aldy, dep habarlaidy "Ult aqparat" QR Densaýlyq saqtaý ministrligine silteme jasap.
Buǵan deiin Almatyǵa Sinopharm-nyń Vero Sell vaktsinasynyń birinshi partiiasy jetkizilgenin jazǵan bolatynbyz.
Densaýlyq ministrligi vaktsinaǵa qatysty tolyq málimet berdi. Oǵan sáikes, búgin, 10 tamyzda Qytai Halyq Respýblikasymen júrgizilgen kelissózderdiń qorytyndysy boiynsha koronavirýsqa qarsy Sinopharm vaktsinasynyń birinshi partiiasy tielgen ushaq Almatyǵa biryńǵai distribiýtor SQ-Farmatsiianyń qoimalaryna keldi.
«Qazaqstanda koronavirýstyń taralýyna jol bermeý jónindegi vedomstvoaralyq komissiia men QR Densaýlyq saqtaý ministrliginiń tapsyrmasy negizinde Biryńǵai distribiýtor Beijiń biologiialyq ónimder institýty ázirlegen Covid-19-ǵa qarsy Sinopharm vaktsinasynyń 4 mln dozasyn satyp alýdy júzege asyrdy.
Sinopharm Qytai vaktsinasynyń birinshi partiiasy 1 mln dozadan turady. Sinopharm vaktsinasy jaqyn kúnderi Qazaqstan Respýblikasynyń azamattaryna koronavirýs infektsiiasyna qarsy vaktsinatsiialaý úshin qoljetimdi bolatyn QR-da besinshi tirkelgen vaktsina bolady», - delingen ministrlik aqparatynda.
Vaktsinany stikerleý rásimi aiaqtalǵannan keiin QR DSM Sanitariialyq-epidemiologiialyq baqylaý komitetiniń ruqsat qaǵazyna sáikes jedel tártipte elimiz óńirlerine jiberiledi.
«Biryńǵai distribiýtor immýnobiologiialyq preparattardyń logistikasyn GMP jáne GDP barlyq standarttaryn, sondai-aq «sýyq tizbekti» saqtai otyryp júzege asyrady. Sinopharm vaktsinasynyń ereksheligi - ony jetkizý protsesi muzdatqyshty qajet etpeidi, +2 +8 gradýs temperatýrada saqtalady jáne tasymaldanady.
Qytaidyń Sinopharm vaktsinasyn DDSU 2021 jyldyń 7 mamyrynda qoldanýǵa maquldady. Vaktsina belsendi emes, eki dozaly. Saqtaý merzimi - 24 ai», - dep naqtylady ministrlikten.
Vedomstvo málimetinde, shilde aiynda Qytaidyń Sinopharm kompaniiasynyń koronavirýsqa qarsy vaktsinasy COVAX vaktsinalar bankine endi.
«Vaktsinalar men immýndaýdyń jahandyq aliansy (GAVI) qytailyq Sinopharm kompaniiasymen kelisim jasaityndyǵyn jariialady.
Bul DDSU-men qaýipsiz jáne tiimdi dep jiktelgen alǵashqy qytai preparaty, 45 elde eresekterge vaktsinalaýǵa ruqsat etilgen. Búgingi tańda Qytaidan basqa, vaktsina BAÁ men Serbiiada óndirýge maquldandy. Sonymen birge, Qytai men BAÁ Qytaidyń Sinopharm farmakologiialyq kompaniiasynyń belsendi emes vaktsinasyn 3 pen 17 jas aralyǵyndaǵy balalarǵa shuǵyl qoldanýdy maquldady», - dedi DSM-nan.
Esterińizge sala keteiik, sáýir aiynyń sońynda Qazaqstan BAÁ-de Nayat-Vax saýda ataýymen shyǵarylǵan Sinopharm kompaniiasynyń Beijiń biologiialyq ónimi institýty preparatynyń million dozasyn satyp alǵan bolatyn.
Densaýlyq saqtaý ministrligi osyndai mańyzdy júkti elge tasymaldaý jáne jetkizý boiynsha qajetti rásimderdi ýaqytyly júrgizýde jedel ózara is-qimyl jasaǵany úshin QR IIDM Azamattyq aviatsiia komitetiniń jáne «EirAstana» AQ aviakompaniiasynyń basshylyǵy men ujymyna rizashylyq pen alǵys bildirdi.
Aita keteiik, vaktsinany tasymaldaý «sýyq tizbek» qaǵidaty boiynsha júrgiziledi - árbir kezeńde temperatýralyq rejimdi qatań saqtaý qamtamasyz etiledi. Sonymen qatar, ár deńgeide - óziniń jaýapty uiymy bar.
Vaktsinalardy tasymaldaý 4 kezeńde júzege asyrylady:
1. Óndirýshiden Biryńǵai distribiýtordyń habtaryna deiin;
2. Biryńǵai distribiýtorlardyń habtarynan óńirlerdiń densaýlyq saqtaý basqarmalarynyń qoimalaryna;
3. Óńirlerdiń densaýlyq saqtaý basqarmalarynyń qoimalarynan meditsinalyq uiymdarǵa;
4. Meditsinalyq uiymdarda qoldanǵanǵa deiin saqtaý.
