Foto: kazgazeta.kz
Qazaqstan Respýblikasynyń zańnamasyna sáikes, árbir azamat óziniń tegin (familiiasyn) ózgertýge quqyly. Tekti qandai jaǵdailarda ózgertedi jáne qandai qujattar kerek? Bul týraly tolyǵyraq «Azamattarǵa arnalǵan» memlekettik korporatsiianyń Almaty filialy aityp ótti, dep habarlaidy Ult.kz.
Tekti ózgertý úshin qajetti qujattar: ótinish, jeke kýálik nemese tólqujat, týý týraly kýálik, neke kýáligi (eger nekede bolsa), balalardyń týý týraly kýálikteri (bar bolsa), memlekettik bajdy tólegen túbirtek (1 ailyq eseptik kórsetkish – AEK), er adamdar úshin – áskeri bilet kóshirmesi.
Bul rásim azamattyń turǵylyqty jeri boiynsha Azamattyq hal aktilerin tirkeý bólimine nemese Halyqqa qyzmet kórsetý ortalyǵyna júginý arqyly júzege asyrylady. Qujattar qabyldanǵan soń, ótinish AHAT bóliminde 30 kún ishinde qaralady.
«Tekti ózgertý ártúrli jaǵdaida oryn alady. Atap aitsaq, óz qalaýy boiynsha, qujatta qate jazylǵan kezde, nekege turý nemese buzý kezinde, balany asyrap alý kezinde tekti ózgertip jatady. Almaty qalasy boiynsha jyl basynan beri 2431 azamat tegin ózgertýge ótinish berdi» ,– deidi AHAT basqarmasynyń basshysy Baian Abdýllanova.
Óz qalaýy boiynsha tekti ózgertýge azamattar 16 jastan bastap ata-anasynyń nemese qamqorshysynyń jazbasha kelisimimen ruqsat ala alady.
Azamattyq hal aktilerine ózgeris engizilip, azamattyń tegi ózgergen soń, jeke kýálik, týý týraly kýálik, júrgizýshi kýáligi, kólik qujattary, eger bolsa neke týraly kýálik, múlikke bailanysty qujattar, banktik shottar men kartalar ózgertilýi tiis.
Aita ketý kerek, diplomdar men attestattardy qaita rásimdeý mindetti emes. Eger qajet bolǵan jaǵdaida, azamattarǵa notarialdy kýálandyrylǵan anyqtama beriledi.
