AQSh aýǵanstandyq bosqyndardy qabyldaýǵa bailanysty Qazaqstanǵa resmi túrde ótinish bildirgen joq, dep habarlady Qazaqstannyń syrtqy ister ministrligi.
2 shilde kúni derekkózge silteme jasaǵan Bloomberg agenttigi AQSh Qazaqstan, Tájikstan, Ózbekstannan 9 myń aýǵandy ýaqytsha qabyldaýdy suraǵanyn jazǵan bolatyn. Olar Aýǵanstannan sheteldik áskeriler shyǵarylyp jatqan ýaqytta AQSh-qa kómektesken.
"Syrtqy ister ministrligine amerikalyq taraptan resmi ótinish túsken joq", – dep habarlady Sputnik Qazaqstanǵa syrtqy saiasi vedomstvodan.
Osyǵan deiin saiasi sholýshy Ǵaziz Ábishev Qazaqstan buǵan kelisse, olardy qaitarý merzimin naqty kórsetip, AQSh-pen kelisimge qol qoiý kerektigin aitqan bolatyn.
Onyń aitýynsha, AQSh ózderine kómektesken aýǵandyqtardy aldymen tekserip alýdy kózdeidi. Olardyń arasynda ekstremister bar ma, joq pa, osynyń bárin anyq bilgisi keledi. Áitpese, Amerikanyń ulttyq qaýipsizdigine qaýip tónedi.
"Biraq biz ondai adamdardy ýaqytsha ornalastyrsaq, AQSh artynan alyp ketetinine naqty kepildik berýi kerek. Mysaly, qazir myńdaǵan adamdy kirgizdik deiik. Al AQSh senatynda otyrǵan respýblikandyqtar tiisti zań qabyldamai qoiady. Sonda ne isteimiz? Basqa elge jibere almaimyz. Aýǵanstanǵa qaitarsaq, adamgershilikke jat. Sóitip, barlyǵy osy jerde qalyp qoiýy da múmkin. Sondyqtan asyǵys sheshim jasaýǵa bolmaidy", - degen edi Ábishev Sputnik Qazaqstanǵa bergen suhbatynda.
1 mamyrdan beri AQSh Aýǵanstan aýmaǵynan óz áskerin áketýdi bastaǵany habarlandy. Bul 11 qyrkúiekke deiin aiaqtalady dep ýáde etti. AQSh prezidenti Djo Baiden AQSh pen eýropalyq elderdiń áskeri kúshteri aýǵan úkimetiniń turaqty damýyn qamtamasyz ete almaidy dep túsindirdi.
Ásker shyǵarýǵa qatysty málimdeme tálibterdiń belsendiligin arttyryp, eldegi jáne shekaradaǵy jaǵdaidyń ýshyǵýyna alyp keldi. Negizinen Tájikstanmen shekaradaǵy ahýal shielenisip, Aýǵanstan úkimet kúshteri áskerileriniń tájik jerine qarai qashýy jiiledi.
