Qazaqstan aýǵan halqyna azyq-túlik jetkizý kólemin arttyrýǵa daiyn. Bul týraly QR Tuńǵysh Prezidenti Nursultan Nazarbaev aitty, dep habarlaidy QazAqparat.
«Aýǵanstandaǵy kúrdeli ahýaldy turaqtandyrý úshin halyqaralyq kúsh-jigerdi shoǵyrlandyrý mańyzdy. Qazaqstan bul protsess aiasynda mańyzdy ortalyq bolýda úlken áleýetke ie. Biz Karzai myrzamen ol Prezident bolǵan kezden-aq birge jumys isteýdi bastadyq jáne myńdaǵan aýǵan Qazaqstannyń oqý oryndarynda oqyp, mamandyq aldy jáne eline oraldy. Únemi gýmanitarlyq kómek kórsettik jáne qazir de oǵan daiynbyz», - dep eske aldy Elbasy «Astana klýb-2021» otyrysynda.
QR Tuńǵysh Prezidenti osy jyldyń tamyzynda Almatyǵa BUU-nyń Aýǵanstanǵa járdem kórsetý jónindegi missiiasy qyzmetkerleriniń kóship kelgenin eske saldy.
«BUU da Aýǵanstanǵa gýmanitarlyq kómek jetkizý úshin Almatyda halyqaralyq logistikalyq hab qurý bastamamyzǵa qoldaý kórsetti. Qazan aiynyń ortasynda delegatsiiamyz Aýǵanstanǵa baryp, aýǵan halqyna 5 myń tonna qazaqstandyq un jetkizdi. Halyqaralyq donorlardy Aýǵanstanǵa gýmanitarlyq kómek kórsetý jáne qalpyna keltirýde Qazaqstandy belsendi paidalanýǵa shaqyramyn. Osy turǵyda meniń Almatyda BUU-nyń Aýǵanstandy ońaltý halyqaralyq ortalyǵyn qurý ideiamnyń ózektiligi arta túsedi. Qazaqstan BUU tetikteri arqyly aýǵan halqyna azyq-túlik jetkizý kólemin arttyrýǵa daiyn. Osy oraida Qazaqstanda qurylǵan «KazAID» halyqaralyq damý agenttigin qarqyndy iske qosý qajet», - dedi Nursultan Nazarbaev.
