Qazaqstan atom elektr stantsiiasy salynatyn jerdi aiqyndady. Bul týraly Sheteldik investorlar keńesiniń otyrysynda Prezident Qasym-Jomart Toqaev aitty, dep habarlaidy "Ult aqparat" QazAqparat agenttigine silteme jasap.
«Parniktik gaz shyǵaryndylaryn tómendetýdegi mańyzdy faktordyń biri - atom energiiasyn paidalaný. Munyń ústine jańaratyn energetikanyń turaqsyzdyǵy jáne gaz generatsiiasynyń shekteýligi jaǵdaiynda álemdik atom úzdiksiz bazalyq generatsiianyń jalǵyz kózi bolady», - dedi Memleket basshysy.
Prezidenttiń atap ótýinshe, Qazaqstannyń atom energetikasyn damytýda birqatar naqty basymdyǵy bar.
Al atom energetikasyn Eýropalyq odaq jasyl tehnologiialar tizimine qosyp otyr.
«Elimiz tabiǵi ýran óndirýde álemde birinshi orynda tur. Iadrolyq otyn komponentteriniń ózindik óndirisi jáne ýrandy baiytý úshin múmkindigi bar. Qazirgi sátte AES ornalasatyn oryndy aiqyndadyq jáne áleýetti jetkizýshilerdiń tehnologiiasyn zerdelep jatyrmyz», - dedi Qasym-Jomart Toqaev.
