Ánshi Dimash Qudaibergen braziliialyq jankúierlerge ótinishin joldap, «Qazaqstan» ataýynyń aiaq astynda jazylǵanyn qalamaitynyn jetkizdi, dep habarlaidy "Ult aqparat".
«Eń aldymen, meniń ánderimdi kúnnen-kúnge súiip tyńdap, ónerime degen mahabbattary artyp kele jatqan braziliialyq, jalpy Latyn Amerikalyq tyńdarmandaryma úlken alǵysymdy bildirgim kelip tur. Sizderdiń bul tosyn syilaryńyzdy da sol súiispenshiliktiń belgisi dep bilemin», - dep jazdy ánshi Instagram paraqshasynda baspaldaqqa jazylǵan «Qazaqstan» ataýynyń sýretin jariialap.
Ánshi alaida týǵan jeriniń, júreginiń tórinen oryn alǵan asyl ólke - Qazaqstanymnyń ataýy aiaq astynda jazylǵanyn qalamaitynyn jetkizdi.
«Túsinemin, bul syilyq maǵan degen tap-taza kóńilderińizden týyndap jatyr.
Biraq, kezinde uly adam sheber sportshy Muhammed Alidi de óte syilap, «Juldyzdar alleiasynan» oryn bergende ol kisi óz esiminiń jerde, aiaq basar tusta taptalyp jatqanyn qalamai, sol baqtyń qabyrǵasyna, iaǵni joǵary jaqqa jazýlaryn suraidy. Sebebi paiǵambardyń esimi aiaq astynda qalmaý kerek. Sol siiaqty meniń qazaq elimniń de ataýy tek joǵaryda tursa eken degen tilegim bar ekenin jetkizgim keledi, ár bir el tek biikten kórinýge laiyqty (!)» - deidi ol.
Osylaisha Dimash Qudaibergen braziliialyq tyńdarmandaryna ótinishin durys jaǵynan túsinip, qabyl alar degen úmit bildirdi.
«Aq nietterińiz úshin taǵy da rahmet», - dep túidi ánshi.
