Qorǵanys ministriniń orynbasary Timýr Dándibaev ortalyq kommýnikatsiialar qyzmetinde ótip jatqan baspasóz máslihatynda qazaq áskerileriniń Aýǵanstan shekarasyn kúzetýge barý yqtimaldyǵy týraly pikir bildirdi, dep habarlaidy "Ult aqparat".
Brifing barysynda BAQ ókilderi tarapynan «Aýǵanstan shekarasyna tálibtermen jaǵdaidy turaqtandyrý úshin Qazaqstan áskerilerin jiberý josparlanyp otyr ma?», - degen suraq qoiyldy.
Oǵan jaýap bergen Qorǵanys ministriniń orynbasary naqty sheshimdi halyqaralyq uiymdar men eldiń Parlamenti qabyldaitynyn túsindirdi.
«Halyqaralyq qaýipsizdik sharalaryn qamtamasyz etip, qoldaý úshin qandai da bir kontingentti jiberý úshin bizge birneshe shart kerek. Ol sharttyń biri – eki taraptyń biri Ujymdyq qaýipsizdik kelisimsharty uiymyna kómek surap júginýi tiis. Ekinshiden, Ujymdyq qaýipsizdik keńesi deńgeiinde sheshim shyǵýy qajet. Árine, ol sheshimdi bizdiń eldiń Parlamenti ratifikatsiialap, halyqaralyq missiia atqaratyn kontingenttiń jiberilýine ruqsat berý kerek. Osy sharttardyń bári oryndalǵan jaǵdaida biz sáikesinshe ózimizdiń halyqaralyq mindetterimizdi oryndaýǵa daiynbyz», - dedi Timýr Dándibaev.
Osy sharada, Qorǵanys ministrliginiń ókili Arystaǵy jarylys saldaryn joiýǵa eleýli úles qosqan elderdiń kómegi týraly málimet bergen bolatyn.
«Birikken Arab Ámirlikteri 43 mln teńgeden astam qarajatqa qondyrǵylar berdi. Úndistannyń qorǵanys vedomstvosy aqysyz negizde jarylystan qorǵaityn kostiýmder berdi. Bul kómekterdiń bári qajettiligi boiynsha baǵyttaldy. Sheteldik mamandar bizdiń mamandardyń tótenshe jaǵdai saldaryn joiý jáne oǵan deiingi kezeńde atqarǵan áreketteri men sheshimderin joǵary baǵalaǵanyn aitqym keledi», - dedi Timýr Dándibaev.
