Qazaqstan álemdegi benzin eń arzan TOP-15 eldiń qataryna kiredi, dep habarlaidy "Ult aqparat" ranking.kz saityna silteme jasap.
Osy jyldyń 13 sáýirindegi derekterge sáikes, álemde AI-95 markaly benzinniń bir litrine ortasha baǵa 0,95 AQSh dollaryn nemese 404,5 teńgeni quraidy. Dúniejúzindegi eń arzan benzin Venesýelada tirkelgen. Bul elde teńgege shaqqanda AI-95 benzininiń bir litri 1 teńgeden de tómen.
Sondai-aq, benzin arzan úsh eldiń qataryna Iran (1 litri 0,09 AQSh dollary nemese 39,2 teńge) men Sýdan (1 litri 0,14 AQSh dollary nemese 59,6 teńge) kirip otyr. TOP-5 eldiń qatarynda Angola (1 litri 0,28 AQSh dollary nemese 121,4 teńge) men Malaiziia (1 litri 0,29 teńge nemese 123,7 teńge) da bar.
Qazaqstanda benzin baǵasy eń tómengi elderdiń qataryna kirip, 11-orynǵa turaqtaǵan. 13 sáýirdegi málimetterge qaraǵanda, elimizde benzinniń ortasha baǵasy 1 litrine - 0,41 AQSh dollary nemese 174 teńge.
Al bul TMD elderindegi eń tómengi baǵa sanalady. Aitalyq, Reseide AI-95 benzininiń bir litri 265,8 teńgeni, Túrikmenstanda 183,4 teńgeni, Ázerbaijanla 201,4 teńgeni, Qyrǵyzstanda 230,2 teńgeni quraidy.
2020 jyldyń naýryzynda Qazaqstanda AI-92 markaly benzinniń bólshek saýdadaǵy ortasha baǵasy 1 litrine 155,02 teńge bolyp, jyl ishinde 4 paiyzǵa, ótken aimen salystyrǵanda 0,5 paiyzǵa qymbattaǵan edi.
Bul markadaǵy eń qymbat benzin Nur-Sultan qalasynda (160 teńge), Kókshetaý (158 teńge) men Óskemende (158 teńge) tirkelgen. Qazaqstanda AI-95 pen AI-96 markaly benziniń bólshek saýdadaǵy ortasha baǵasy jyl ishinde 2,7 paiyzǵa qymbattap, 1 litri 173,79 teńge boldy jáne osy jyldyń aqpanymen salystyrǵanda baǵa 0,1 paiyzǵa qymbattady. Bul markaly eń qymbat benzin Nur-Sultanda (178 teńge), Atyraý (178) men Kókshetaýda (177) satylady.
Al jazǵy dizel otyny bir aidyń ishinde 0,1 paiyzǵa arzandap, litri 192,63 teńgege deiin tómendedi. Qymbat dizel Kókshetaý (198 teńge),Qostanai (197) jáne Atyraý (196) qalalarynda tirkelgen.
