Qazaqstan Respýblikasynyń Premer-Ministri Asqar Mamin AQSh Halyqaralyq damý qarjy korporatsiiasynyń (DFC) bas atqarýshy direktory Adam Bolermen kelissóz júrgizdi, dep habarlaidy "Ult aqparat" Úkimet basshysynyń resmi saityna silteme jasap.
Taraptar AÓK, týrizm, logistika, infraqurylym, sondai-aq qarjy jáne tehnologiialar salalaryndaǵy investitsiialyq yntymaqtastyqty damytý perspektivalaryn talqylady. Bul rette Qazaqstan Respýblikasy ekonomikasynyń jeke sektoryn damytýǵa baǵyttalǵan jobalar men bastamalardy birinshi kezekte iske asyrý qajet ekeni atap ótildi.
Kelissóz qorytyndysy boiynsha «Astana» halyqaralyq qarjy ortalyǵynyń ákimshiligi» AQ men AQSh Halyqaralyq damý qarjy korporatsiiasy arasynda investitsiialyq yntymaqtastyq týraly kelisimge qol qoiyldy.
Qujat Qazaqstan Respýblikasynda $1 mlrd deiingi somaǵa AHQO platformasy arqyly birlesken investitsiialyq jobalardy iske asyrýdy kózdeidi.
AQSh-tyń Halyqaralyq damý qarjy korporatsiiasy Amerika Qurama Shtattarynyń damý institýty, ol shetelde jeke jobalardy qarjylandyrýdy qamtamasyz etýge jáne qoldaýǵa jaýapty. DFC 2019 jylǵy 20 jeltoqsanda Sheteldik jeke investitsiialar korporatsiiasynyń (OPIC) AQSh-tyń halyqaralyq damý agenttiginiń (USAID) Damýdy nesielendirý basqarmasymen birigýi arqyly quryldy.
Kelissózge Qazaqstan tarapynan QR Premer-Ministriniń birinshi orynbasary Álihan Smaiylov, QR Strategiialyq josparlaý jáne reformalar jónindegi agenttiginiń tóraǵasy – AHQO basqarýshysy Qairat Kelimbetov, syrtqy ister ministri Muhtar Tileýberdi, Amerika tarapynan — AQSh-tyń Qazaqstandaǵy elshisi Ýiliam Mozer, DFC bas atqarýshy direktorynyń keńesshisi Kaleb Makkarri, DFC basqarýshy direktory Allison Mainor qatysty.
