Búgin Máýlen Áshimbaevtyń tóraǵalyǵymen Qazaqstan Respýblikasynyń astanasyn Nur-Sultan qalasy dep qaita ataýǵa qoldaý bildirý maqsatynda Demokratiialyq kúshterdiń «Qazaqstan-2050» jalpyulttyq koalitsiiasynyń otyrysy ótkizildi.
Jiyndy ashqan «Nur Otan» partiiasy Tóraǵasynyń Birinshi orynbasary qazirgi tańda Qazaqstan halqynyń tarihi kezeńdi bastan keshirip jatqanyn aitty. Sondai-aq ol Elbasynyń óziniń prezidenttik ókilettigin toqtatý týraly sheshimi bir sátte qabyldanbaǵanyn, ol úshin Tuńǵysh Prezidentimiz uzaq oilanyp, barlyq máseleni saralap, salmaqtaǵanyna nazar aýdardy.
– Qazaqstan halqy úshin Tuńǵysh Prezidentimizdiń esimi árdaiym memlekettilik, egemendik jáne Táýelsizdik siiaqty asa mańyzdy qundylyqtarmen bir qatarda turady. Qazirdiń ózinde Elbasynyń esimi táýelsiz memleketimizdiń negizin qalaýshy, barlyq reformalardyń avtory, álemdik deńgeidegi saiasatker retinde tarihymyzǵa altyn áriptermen jazylatyny sózsiz, – dedi Máýlen Áshimbaev.
Sonymen qatar «Nur Otan» partiiasy Tóraǵasynyń Birinshi orynbasary Elbasynyń erik-jigeri men tabandylyǵynyń arqasynda táýelsiz memleket bolyp qalyptasqan Qazaqstannyń barlyq jeńisteri men jetistikteri Tuńǵysh Prezidentimizdiń esimimen tyǵyz bailanysty ekenin tilge tiek etti. Sondyqtan Máýlen Áshimbaev Nursultan Nazarbaevtyń aldaǵy ýaqytta da Elbasy, Qaýipsizdik Keńesiniń Tóraǵasy, «Nur Otan» partiiasynyń Tóraǵasy, Qazaqstan halqy Assambleiasynyń tóraǵasy, Konstitýtsiialyq Keńestiń múshesi retinde eldiń strategiialyq damýyna airyqsha yqpal etetin uly tulǵa bolyp qala beretinine nazar aýdardy.
Sondai-aq ol elorda ataýyn ózgertý Elbasy saiasatynyń myzǵymastyǵynyń jarqyn kórinisi ekenin aitty.
– Bas qalaǵa Tuńǵysh Prezidentimizdiń esimin berý arqyly biz barsha qazaqstandyqtar men halyqaralyq qaýymdastyqqa elimizdiń damý jolynda Elbasy saiasaty odan ári jalǵasatynyn kórsetemiz. Sondyqtan bul sheshimdi qoldai otyryp, mundai mańyzdy qadamdy halyqtyń Elbasynyń táýelsiz Qazaqstannyń negizin qalap, astanamyzdy salýdaǵy eren eńbegine kórsetken zor qurmeti dep qabyldaimyz, – dedi Máýlen Áshimbaev.
Otyrysqa Koalitsiia músheleri: eldegi jetekshi partiialardyń basshylary, Parlament depýtattary, Qazaqstan halqy Assambleiasynyń, kásibi jáne qoǵamdyq birlestikterdiń ókilderi qatysty. Is-shara sońynda barsha qazaqstandyqtardy Qazaqstannyń Tuńǵysh Prezidenti aiqyndaǵan eldiń strategiialyq basymdyqtaryna sózben de, ispen de tolyq qoldaý kórsetýge jáne Elbasynyń Táýelsizdikti kúsheitýge, eldi júieli jańǵyrtýǵa, sondai-aq, árbir qazaqstandyqtyń ál-aýqatyn arttyrýǵa baǵyttalǵan saiasatyn birlesip jalǵastyrýǵa, astanamyzdyń ataýyn ózgertý týraly tarihi sheshimge ún qosýǵa shaqyrǵan Úndeý qabyldandy.
