Dúniejúzilik densaýlyq saqtaý uiymynyń basshysy Tedros Gebreisýs aqyn, Qazaqstannyń eńbek sińirgen qairatkeri Júrsin Ermandy mereitoiymen qazaq tilinde quttyqtady, dep habarlaidy Sputnik Qazaqstan.
"Qurmetti Júrsin quda, mereitoiyńyz qutty bolsyn! Densaýlyǵyńyz zor bolsyn, ómirińiz uzaq bolsyn! Qudalyǵymyz máńgilik bolsyn! Arbasa nápsi ibilis, alańdap qalam, ulyp ish. Kóńilge nege syimaisyń, kózime syiǵan qubylys. Raqmet!", - deidi Gebreisýs.
Aitys uiymdastyrýshysy, aqyn Júrsin Erman DDSU basshysymen quda ekenin rastady.
"Meniń Ardaq degen kishi qyzym bar. Osy Almatyda turady. Sodan týǵan Aidana degen nemere jienim bar. Sol balany mektepte oqyp júrgende til úirensin dep Jańa Zelandiiaǵa jibergenbiz. Sol jaqta mektepti bitirgennen keiin ózi Shveitsariiadaǵy akademiiaǵa "qonaq úi biznesi" boiynsha oqýǵa túsken. Odan keiin Ispaniiaǵa baryp, magistratýrada oqydy. Al tórt jyl buryn Dúniejúzilik densaýlyq saqtaý uiymynyń bas direktory Tedros Gebreisýstyń úlken ulyna turmysqa shyqqan. Qazir bir qyzy bar", - dedi Erman Sputnik Qazaqstan tilshisine bergen suhbatynda.
Onyń aitýynsha, Tedros Gebreisýs bas quda retinde Qazaqstanǵa kelip ketken. Aidanany uzatýǵa qatysty. Kúni keshe Júrsin Erman 70-jasqa toldy. Meretoiǵa Jenevadaǵy bas quda da shaqyryldy. Biraq jumys babyna bailanysty kele almaǵan.
"Tedros quda kelem degen. Biraq kele almady. Dúniejúzilik densaýlyq saqtaý uiymynyń sezi bolyp qaldy. Sodan beinequttyqtaý jiberdi. Qazaqsha sóiledi. Sońynda meniń bir aýyz óleńimdi de oqyp berdi", - dep atap kórsetti Erman.
Aidana shetelde qalsa da, tól mádenieti men ónerin umytpaidy. Ózimen birge dombyrany alyp ketken. Án aityp, kúi tartady. Al atasyna qazaq tilin úiretip qoiǵan.
