دٷنيەجٷزٸلٸك دەنساۋلىق ساقتاۋ ۇيىمىنىڭ باسشىسى تەدروس گەبرەيسۋس اقىن, قازاقستاننىڭ ەڭبەك سٸڭٸرگەن قايراتكەرٸ جٷرسٸن ەرماندى مەرەيتويىمەن قازاق تٸلٸندە قۇتتىقتادى, دەپ حابارلايدى Sputnik قازاقستان.
"قۇرمەتتٸ جٷرسٸن قۇدا, مەرەيتويىڭىز قۇتتى بولسىن! دەنساۋلىعىڭىز زور بولسىن, ٶمٸرٸڭٸز ۇزاق بولسىن! قۇدالىعىمىز مەڭگٸلٸك بولسىن! ارباسا نەپسٸ ٸبٸلٸس, الاڭداپ قالام, ۇلىپ ٸش. كٶڭٸلگە نەگە سىيمايسىڭ, كٶزٸمە سىيعان قۇبىلىس. راقمەت!", - دەيدٸ گەبرەيسۋس.
ايتىس ۇيىمداستىرۋشىسى, اقىن جٷرسٸن ەرمان ددسۇ باسشىسىمەن قۇدا ەكەنٸن راستادى.
"مەنٸڭ ارداق دەگەن كٸشٸ قىزىم بار. وسى الماتىدا تۇرادى. سودان تۋعان ايدانا دەگەن نەمەرە جيەنٸم بار. سول بالانى مەكتەپتە وقىپ جٷرگەندە تٸل ٷيرەنسٸن دەپ جاڭا زەلانديياعا جٸبەرگەنبٸز. سول جاقتا مەكتەپتٸ بٸتٸرگەننەن كەيٸن ٶزٸ شۆەيتساريياداعى اكادەميياعا "قوناق ٷي بيزنەسٸ" بويىنشا وقۋعا تٷسكەن. ودان كەيٸن يسپانيياعا بارىپ, ماگيستراتۋرادا وقىدى. ال تٶرت جىل بۇرىن دٷنيەجٷزٸلٸك دەنساۋلىق ساقتاۋ ۇيىمىنىڭ باس ديرەكتورى تەدروس گەبرەيسۋستىڭ ٷلكەن ۇلىنا تۇرمىسقا شىققان. قازٸر بٸر قىزى بار", - دەدٸ ەرمان Sputnik قازاقستان تٸلشٸسٸنە بەرگەن سۇحباتىندا.
ونىڭ ايتۋىنشا, تەدروس گەبرەيسۋس باس قۇدا رەتٸندە قازاقستانعا كەلٸپ كەتكەن. ايدانانى ۇزاتۋعا قاتىستى. كٷنٸ كەشە جٷرسٸن ەرمان 70-جاسقا تولدى. مەرەتويعا جەنەۆاداعى باس قۇدا دا شاقىرىلدى. بٸراق جۇمىس بابىنا بايلانىستى كەلە الماعان.
"تەدروس قۇدا كەلەم دەگەن. بٸراق كەلە المادى. دٷنيەجٷزٸلٸك دەنساۋلىق ساقتاۋ ۇيىمىنىڭ سەزٸ بولىپ قالدى. سودان بەينەقۇتتىقتاۋ جٸبەردٸ. قازاقشا سٶيلەدٸ. سوڭىندا مەنٸڭ بٸر اۋىز ٶلەڭٸمدٸ دە وقىپ بەردٸ", - دەپ اتاپ كٶرسەتتٸ ەرمان.
ايدانا شەتەلدە قالسا دا, تٶل مەدەنيەتٸ مەن ٶنەرٸن ۇمىتپايدى. ٶزٸمەن بٸرگە دومبىرانى الىپ كەتكەن. ەن ايتىپ, كٷي تارتادى. ال اتاسىنا قازاق تٸلٸن ٷيرەتٸپ قويعان.
