Foto: instagram.com/kazakhmys_official
Qazaqmys kompaniianyń bir bóligin reseilikterge satý týraly qaýesetke qatysty jaýap berdi, - dep habarlaidy Tengrinews.kz portaly.
Buǵan deiin áleýmettik jelilerde qazaqstandyq korporatsiianyń reseilikterge satylý yqtimaldyǵy týraly aqparat paida bolǵan edi. Oǵan jeltoqsanda Resei Federatsiiasynyń úsh azamaty korporatsiianyń top-menedjerleri boldy degen qaýeset negiz bolǵan: Oleg Kopytov "Qazaqmystyń" bas direktory bolyp taǵaiyndalǵan, Peretolchin I.V. - tehnikalyq direktor, al Kozak E. - uiymdastyrýshylyq damý jáne personaldy basqarý jónindegi direktor.
"Keibir BAQ pen áleýmettik jelilerde "Qazaqmys" kompaniiasynyń iskerlik bedeline nuqsan keltiretin arandatýshylyq materialdar paida bola bastady. Bul jaǵymsyz aqparattyń esh negizi joq jáne tek kompaniia basshylyǵynyń bedelin túsirýge jáne qazaqstandyq qoǵamdy turaqsyzdandyrýǵa baǵyttalǵan. Qazaqmys kompaniialar toby árqashan qazaqstandyq holding boldy jáne bolyp qala beredi", - delingen kompaniia habarlamasynda.
Kásiporynǵa sheteldik mamandardy tartý erekshe jaǵdailarda ǵana júrgiziletini atap ótildi.
"Máselen, "Qazaqmys Korporatsiiasy" JShS-niń bas direktory qyzmetine jaqynda ǵana taǵaiyndalǵan Oleg Kopytov óz isiniń naǵyz kásibi mamany. Onyń taý-ken salasyndaǵy eńbek ótili 22 jyl, al ol bizdiń kompaniiada 2009 jyldan beri jumys isteidi", - dedi kompaniia ókilderi.
Igor Peretolchinniń jaǵdaiy da osyndai, onyń taý-ken ónerkásibindegi kópjyldyq tájiribesi kompaniiaǵa óndiristik protsesterdi jaqsartýǵa kómektesip keledi.
Kompaniianyń taǵy bir sheteldik mamany - Evgenii Kozak, "Qazaqmys Holding" JShS uiymdyq damý jáne personaldy basqarý jónindegi direktory, ol - Ýkraina azamaty.
"Taratylǵan jazbada Qazaqstan azamaty Marina Krasiýkqa qatysty shyndyqqa janaspaityn aqparat boldy. Marina Vladimirovna Qazaqstanda týyp-ósken, ol qazir elimizdiń jáne kompaniianyń igiligi úshin jumys istep jatyr", - dep qosty "Qazaqmys" ókilderi.
