«Kazahavtodor» seriktestiginiń aktsiialary men memlekettik qatysý úlesi «QazAvtoJol» ulttyq kompaniiasyna berilmek.
Indýstriia jáne infraqurylymdyq damý ministrliginiń Avtomobil joldary komitetiniń mundai sheshimi ashyq talqylaýǵa shyǵaryldy, dep habarlaidy QazAqparat.
«Kazahavtodor» jaýapkershiligi shekteýli seriktestiginiń 100 paiyz aktsiialary men memlekettik qatysý úlesi «QazAvtoJol» Ulttyq kompaniiasyna berilsin. Qarjy ministrliginiń Memlekettik múlik jáne jekeshelendirý komiteti Qazaqstan Respýblikasy Indýstriia jáne infraqurylymdyq damý ministrligimen birlesip zańnamada belgilengen tártippen osy qaýlyny iske asyrý úshin qajetti sharalardy qabyldasyn», - dep kórsetilgen qujatta.
Qaýlyda atalǵan sheshim qabyldansa, avtomobil joldaryn paidalanýshylardyń shaǵymdaryna jedel áreket etý múmkindigi artatyny jazylǵan. Sonymen qatar, kompaniialardy biriktirý kezinde eki kásiporynda da bar jáne qaitalama mindet atqaratyn qyzmetkerler sany qysqartylady.
Qujat qol qoiylǵan kúnnen bastap kúshine enedi.
Aita keteiik, Memleket basshysy Qasym-Jomart Toqaev Úkimettiń keńeitilgen otyrysynda «Qazavtojol» men «Qazavtodor» kompaniialaryn biriktirý kerektigin aitty. «Kelesi másele – avtojol salasyna qatysty. Bul salaǵa túbegeili reforma jasaityn ýaqyt jetti. Qazir elimizdegi joldyń jai-kúiin qadaǵalap, qyzmet kórsetetin eki negizgi operator bar. Týrasyn aitsaq, ekeýi de bir jumysty atqaryp otyr, jumysshylarynyń sany da qajetti shamadan artyq», - dedi Qazaqstan Prezidenti.
Memleket basshysynyń aitýynsha, azamattardan kelip jatqan oryndy aryz-shaǵymdar azaiar emes. Al joldyń sapasy múlde syn kótermeidi.
Úkimetke «QazAvtoJol» jáne «Kazahavtodordy» biriktirip, Qazaqstannyń birtutas avtojol kompaniiasyn qurýdy tapsyramyn. Nátijesinde qyzmetkerlerdiń sany da qysqaratyn bolady», - dedi Qasym-Jomart Toqaev.
