«Qazaqfilm» AQ jumysy tabysty bolmai tur. Mádeniet jáne sport ministrliginiń jekelegen biýdjettik baǵdarlamalarynyń iske asyrylýy boiynsha júrgizilgen memlekettik aýdittiń qorytyndysy boiynsha Esep komitetiniń múshesi Talǵat Jaqan osylai dedi, dep habarlaidy QazAqparat.
«2018-2019 jyldar aralyǵynda «Qazaqfilm» AQ-ty ustap turýǵa 1 mlrd 129 mln teńge shyǵyndalǵan. Kórsetilgen kezeńdegi is-sharalardy ótkizýden túsken tabys - film óndirisin qospaǵanda, 638,1 mln teńgeni nemese ketken shyǵynnyń 56,5 paiyzyn qurady. Qazirgi ýaqytta «Qazaqfilm» AQ kinoindýstriiasynyń salalyq qalyptastyrýshy kásiporny moraldyq jáne fizikalyq turǵydan tozyp qalǵan materialdyq-tehnikalyq bazaǵa ie. Zamanǵa sai qural-jabdyqtarmen jáne tehnologiialarmen tiisti túrde jańǵyrtylyp, tehnikalyq turǵyda jaraqtandyrylǵan jaǵdaida «Qazaqfilm» ózin-ózi aqtai alýy múmkin. Mysaly, Reseidiń «Mosfilmi» men Ózbekstannyń «Ózbekkino» ulttyq agenttigi osylai jumys júrgizedi. Ol jaqta tolyqqandy kino óndirisi men táýelsiz kino naryǵyn qurýǵa jaǵdai jasalǵan», - dedi ol Esep komitetiniń otyrysynda.
Talǵat Jaqan sonymen birge, «Qazaqfilm» AQ-qa kino nemese derekti film bolyp túsirilmei qalǵan ádebi stsenariiler de qabyldanǵanyn aitady. Prokatta suranysqa ie bolmaityn filmder de shyǵarylǵan.
«Máselen, 2010 jyldan bastap bekitilgen 48 stsenarii boiynsha filmder túsirilmei, túsirilgen 325 filmniń 185-i prokatqa shyqpai qalǵan. Olardyń quny 19 milliard teńgeden asady. Kinoteatrlar men teledidarlar arqyly taratýdan túsken kirister filmderdiń ózindik baǵasyn shyǵaryp bere almaidy. Sońǵy 9 jyl ishinde 161 kartina jasalyp, olarǵa 42 milliard 951 million teńge jumsalǵan», - dep qorytyndylady Talǵat Jaqan.
