Qazaqstan Respýblikasy Premer-Ministriniń orynbasary Eraly Toǵjanov Almatyǵa jumys sapary aiasynda Almaty qalasy ákiminiń orynbasary Erjan Babaqumarovpen birge «Qazaqfilm» AQ ǵimaratynda bolyp, shyǵarmashylyq ziialy qaýymmen jáne Dostyq Úiinde etnomádeni birlestikterdiń kóshbasshylarymen kezdesti, dep habarlaidy "Ult aqparat".
Vitse-premer kinostýdiiany jańǵyrtýdyń jańa baǵdarlamasymen tanysty. «Qazaqfilm» AQ prezidenti Aqan Sataev memleket bólgen qarajat aiasynda kelesi jyly qurylys jumystaryn bastaý josparlanǵanyn aitty. Úsh jyldyq kezeńde barlyq nysandar jóndeledi, eki angar salynady, injenerlik jeliler jańartylady.
«Osy jumystardyń arqasynda biz kinostýdiiany jańa halyqaralyq deńgeige shyǵaryp, Aziia aimaǵynda kóshbasshy orynǵa shyqqymyz keledi. Biz altyn murany saqtai otyryp, alǵa sapaly qadam jasaǵymyz keledi. Qala ákimdigi tarapynan úlken qoldaý kórsetilýde», - dedi Aqan Sataev.
Eraly Toǵjanov akterler Asanáli Áshimov pen Merýert Ótekeshevany, sondai-aq dybys operatory Qadyr Qosaidy otandyq kinoindýstriiada erekshe oryn alatyn jáne milliondaǵan kórermen moiyndaǵan «Qyz Jibek» pen «Atamannyń aqyry» filmderiniń 50 jyldyǵymen quttyqtady. Kinematografisterge «Qazaqfilm» kinostýdiiasy jáne «Qazposhta» AQ shyǵarǵan arnaiy poshta markalary tabys etildi.
Kezdesý barysynda qazaq aqyny, jýrnalist jáne redaktor, Qazaqstannyń eńbek sińirgen qairatkeri, QR Jazýshylar odaǵynyń tóraǵasy Ulyqbek Esdáýlet infraqurylymdy jańǵyrtý máselelerine toqtaldy. Onyń aitýynsha, Almaty qalasy ákimdiginiń qoldaýymen Jazýshylar úiiniń negizgi ǵimaratynda jóndeý jumystary aiaqtaldy, kelesi satyda - konferentsiia-zaly. Modernizatsiialaý aiasynda nysannyń tarihi kelbetin saqtaý kózdelgenin atap ótti.
Sonymen birge, Premer-Ministrdiń orynbasary E.Toǵjanov respýblika men qalanyń etnomádeni birlestikteriniń ókilderimen búkilqazaqstandyq birlikti nyǵaitý jáne memlekettik jáne azamattyq qoǵam institýttarynyń etnosaralyq qatynastar salasyndaǵy ózara is-qimylynyń tiimdiligin arttyrý máselelerin talqylady.
«Ahyska» túrik etnomádeni ortalyǵy» RQB tóraǵasy Ziiatdin Kasanov, «Mitsva» Qazaqstannyń evrei ulttyq uiymdary qaýymdastyǵy» ZTB basshysy Aleksandr Baron, «Qazaqstan uiǵyrlarynyń respýblikalyq mádeni ortalyǵy» QB qurmetti tóraǵasy Ahmetjan Shardinov, «Nairi» Qazaqstan Respýblikasynyń armian mádeni ortalyqtary qaýymdastyǵy» respýblikalyq QB tóraǵasy Artýsh Karapetian júrgizilip jatqan jumystar týraly aqparat berip, etnosaralyq kelisimdi, qoǵamdaǵy toleranttylyq pen halyq birligin odan ári nyǵaitý boiynsha birqatar usynystar aitty.
Jekelei alǵanda, otandyq ǵylymdy, ulttyq mádeniet jáne salt-dástúrlerdi damytý, sonymen birge, pandemiiamen jalpy kúres aiasynda etnomádeni uiymdardyń integratsiiasy boiynsha kúsh salýy, muqtaj qala turǵyndaryna qoldaý sharalary jónindegi ideialar aityldy.
Etnomádeni birlestikterdiń kóshbasshylarymen kezdesý qorytyndysy boiynsha Premer-Ministrdiń orynbasary Eraly Toǵjanov QR Aqparat jáne qoǵamdyq damý ministrligine aitylǵan usynystardy zerdelep, pysyqtaýdy tapsyrdy.
