«Qazaqaltyn» kompaniiasy men onyń enshiles kásiporyndarynyń qyzmetkerleri birjolǵy materialdyq kómek alady. Kontsern basshylyǵy uzaq ýaqytqa sozylǵan COVID-19 pandemiiasyna bailanysty shtattaǵy jumysshylarǵa 100 myń teńgeden bólý týraly sheshim qabyldady.
«Qazaqaltyn TMK» AQ koronavirýs pandemiiasy kezinde biznestiń áleýmettik jaýapkershiligine qatysty el basshylyǵynyń bastamasyn qoldady. Osy qiyn-qystaý kezeńde otandyq kásiporyndardyń jumysshylaryna materialdyq qoldaý kórsetý qajettiligin Qazaqstan Respýblikasynyń Tuńǵysh Prezidenti - Elbasy Nursultan Nazarbaev pen Memleket basshysy Qasym-Jomart Toqaev atap ótken bolatyn.
Birjolǵy tólem «Qazaqaltyn» kontserniniń quramyna kiretin kásiporyndardyń 5 412 jumysshysyna tiesili. Bul maqsatqa kompaniia basshylyǵy shamamen 550 million teńge bóldi. Qazaqstan Respýblikasynyń zańnamasyna sáikes, mundai materialdyq kómekke salyq salynýy tiis, sondyqtan qyzmetkerler biýdjetke mindetti tólemderdi shegerip tastap, aqsha alady. Qarjylai kómek kásiporyndardyń basshylyq quramyna jáne kelisim-shart boiynsha jumys isteitin qyzmetkerlerge taǵaiyndalmaidy.
Kompaniianyń bul bastamasy COVID-19 pandemiiasy kezinde jumysshylar ujymyn áleýmettik turǵyda qoldaýǵa baǵyttalǵan is-sharalardyń jalǵasy bolyp tabylady. Elde tótenshe jaǵdai jariialanǵan kezde «Qazaqaltyn» óz qyzmetkerleri men olardyń otbasylaryn, sondai-aq kompaniianyń óndiristik bazalary bar Aqsý, Bestóbe jáne Jolymbet aýyldarynyń turǵyndaryn meditsinalyq maskalarmen jáne antiseptikalyq zattarmen qamtamasyz etti. Bul baǵyttaǵy jumys jalǵasady.
