Elordadaǵy Ulttyq akademiialyq kitaphanada Qazaqstannyń halyq jazýshysy, qoǵam qairatkeri Sherhan Murtazany eske alý keshi ótti, dep habarlaidy QazAqparat tilshisi.
Jiyn bir minýt únsizdikpen bastaldy jáne onda qalamgerdiń ómiri men shyǵarmashylyǵy, qoǵamdaǵy róli áńgimelendi.
«Qazaq jýrnalistikasynyń qabyrǵasy kúirep tústi deýge bolady. Óitkeni, qazaq jýrnalistikasynda Sherhandai kóp júk kótergen, kóp shákirt tárbielegen, jýrnalistikaǵa shyǵarmashylyq úles qosyp, bedelin aspanǵa kótergen adam az. Bul kisi jazsa da, sóilese de úlgi edi. Isi men sózi birdei, minezi men jazýy qabysqan adam. Bireýler jazýǵa sheber bolsa da, isi orailaspai jatady. Bireýler isker bolsa da, jazýy kelispei jatady. Sherhan shyǵarmashylyǵy men adami qasieti birdei adam boldy, sonysymen ózgelerge úlgi edi. Mundai tulǵany joǵaltý - ult úshin orny tolmaityn úlken qaiǵy», - dedi belgili jýrnalist, akademik Namazaly Omashev.
Onyń aitýynsha, Sherhannyń ómirden ozýy qazaq jýrnalistikasyna ǵana emes, tutas halyqqa aýyr tiip otyr.
«Qazaq halqy óziniń asyl ulynan aiyryldy. Sheraǵańdy bilmeitin qazaq kemde-kem. Shyǵarmashylyqta ǵana emes, óziniń adal minezimen, qaisarlyǵymen, tabandylyǵymen eldiń rýhyn kótergen, ultyn biikke súiregen, Alash arystarynyń minez-qulqyn boiyna sińirip, basyn báigege tikken qazaq ómirden ótti», - dedi akademik.
Sonymen birge, jýrnalist keleshekte Sherhan shyǵarmashylyǵynyń kemeldene túsetinin jetkizdi.
«Sherhannyń máńgilik ǵumyry bastaldy. Taý siiaqty alystaǵan saiyn jazǵan dúnieleri burynǵydan da kemeldenip, biiktei túsetini anyq. Qazaq halqy, qazaq jýrnalistikasy, qazaq ádebieti turǵanda, Sherhandar biiktei beredi. Qabylan minez qaisar aǵamyzdyń topyraǵy torqa, jatqan jeri jaily jánnat bolsyn», - dedi N. Omashev.
Eske sala ketsek, qalamger keshe shamamen 18:30-da Almaty qalasynda aýyr naýqastan qaitys boldy.
Sherhan Muratazamen qoshtasý rásimi 11 qazan kúni saǵat 10.00-de M. Áýezov atyndaǵy Qazaq Memlekettik akademiialyq drama teatrynda ótedi. Jazýshy Keńsai ziratyna jerlenedi.
Jazýshy qyrkúiek aiynda 86 jasqa tolǵan edi.
