6 qyrkúiek kúni Elordamyzda «Habar» Agenttiginiń tapsyrysymen túsirilgen, rejisser Murat Bidosovtyń «Qalamger» dramasynyń tusaýkeseri ótti, dep habarlaidy «Habar» agenttigi.
Kórkem filmniń stsenariiin - Serjan Zákeruly jazǵan.
Kartinada ótken ǵasyrdyń 70-80-jyldarynda ómir súrgen qalamgerlerdiń ómiri men shyǵarmashylyǵy sýretteledi. Sol zamandaǵy dúiim jurttyń baryn baptap, joǵyn joqtaýmen júrgen qarymy mol qazaq jazýshylarynyń bastan keshken náýbetteri, zaman men adam aǵymyndaǵy qarama-qaishylyqtar, bilik pen buqara arasyndaǵy bailanys osy filmge arqaý bolǵan.
«Jazýshylar Odaǵynyń biik minberinde partiianyń jalyndy úndeýleri jariialansa, Jazýshylar úiiniń irgesindegi «Qalamger» dámhanasynda aitylatyn áńgimelerdiń aýany tipti basqa bolatyn. Kompartiia nusqaýlarynyń kúshi júrmeitin, tsenzýranyń qamyty qyspaityn, jazýshylardyń oiyn ashyq aityp, ázili men astarly áńgimesi, qaljyńy men qaǵytpasy qatar júretin «Qalamger» dámhanasy sol kezdegi qoǵamnyń shynaiy bet-perdesiniń simvoly retinde alynyp otyr. Atalmysh drama bir jaǵy - qolyna qalam ustaǵan jazýshy qaýymdy meńzese, astarly maǵynasynda qalamger qaýymnyń táýelsizdikke umtylǵan bulqynysy, ishine syimaǵan sherlerin tarqatatyn oryn - «Qalamger» dámhanasy jaiynda bolady», - deidi kartinanyń rejisseri Murat Bidosov.
Oqiǵa jelisi boiynsha Alash ádebieti taqyrybynda maqala jazyp kózge túsken Sátjan esimdi jas jazýshy belgili professordyń shaqyrýymen Almatyǵa keledi. Jazýshylar odaǵyna jumysqa ornalasyp, professordyń jetekshiligimen atyn ataýǵa tiym salynǵan Alash ádebietiniń aqtańdaq betterimen tereńdei tanysyp, ǵylymi disertatsiiasyn jazýǵa kirisedi. Jazýshylar arasynda Ortalyq Komitettiń kózi men qulaǵy bolyp júretinder Sátjannyń ár basqan qadamyn ańdyp, onyń isine barynsha tosqaýyl qoiady.
Jalpy film ómirde bolǵan adamdardyń prototipteri arqyly, olardyń basynan keshken naqty oqiǵalaryna súiene otyryp sol dáýirdiń tynys-tirshiligin kórsetedi.
«Týyndy keiipkerleriniń kópshiligi - tarihi tulǵalar. 70 jyldarda ómir keshken aqyn-jazýshylar. Bul tarihi oqiǵalar men shynaiy adamdardyń basynan keshkenderi bolǵanymen, kórkem týyndyǵa tán oqiǵa jelisi de qatar órbidi. Tarihi tulǵalarmen qatar, kórkem obrazdar da qosylǵan. Týyndydaǵy bas keiipker Sátjan óz dáýirindegi qalamger qaýymynyń jiyntyq obrazy bolsa, oǵan qarsy turatyn jaǵymsyz keiipker de sol dáýirdegi partiianyń soiylyn soqqan, ýaqyttyń qurbany deýgede bolady» - deidi «Qalamger» filminiń stsenarii avtory Serjan Zákeruly.
Filmge kórnekti jazýshy Dýlat Isabekov jáne aqyn Baqyt Bedelhandar keńesshi retinde tartylyp, týyndynyń jalpy mazmuny men kórkemdik talaptary sol kisilerdiń súzgisinen ótken.
Kartinada basty rólderdi Baǵdaýlet Shaimahan, Jalǵas Tolǵanbai, Nargiz Altaibai, Ergenbai Abýev, Dosjan Janbotaev, Baltabai Seiitmamytov, Kenen Aqúrpekov, Aidar Amanbai jáne t.b. akterlar somdaidy.
Aita keteiik, týyndy 12 qyrkúiekten bastap elimizdiń kinoteatrlarynda kórsetiledi.
Dramanyń treilerin myna silteme arqyly kóre alasyz.
