2017 jyldyń sáýir aiynan beri 77 oqýlyq qazaq tiline aýdarylyp, elimizdegi 132 joǵary oqý oryndarynyń kitaphanalaryna jetkizildi. Bul týraly elorda ákimdiginde ótken «Qazaq tilindegi 100 jańa oqýlyq» jobasy aiasyndaǵy Ulttyq aýdarma biýrosynyń jumysy týraly brifingte aityldy, dep habarlaidy QazAqparat.
«Qazaq tilindegi 100 jańa oqýlyq» jobasynyń maqsaty – dúnie júzindegi eń ilgeri joǵarý oqý oryndarynyń baǵdarlamalaryna kirgen, álem boiynsha bilim berý salasynda keńinen qoldanylatyn oqýlyqtardy qazaq tiline aýdaryp, bizdiń stýdentterge jetkizý. Jobany iske asyrmas buryn bizdiń eldegi joǵary oqý ornynan qandai oqýlyqtardy aýdarý kerektigi týraly usynys suradyq. Jaýap retinde 800 kitaptyń tizimi keldi. Arnaiy jumys toby negizgi talaptardy anyqtap, sonyń negizinde jyl saiyn 30 oqýlyqtan bekitip berip otyrdy. Qazirgi ýaqytta «Rýhani jańǵyrý» baǵdarlamasy qolǵa alynǵan 2017 jyldyń sáýir aiynan beri 77 oqýlyqty aýdaryp, basyp shyǵaryp, elimizdegi 132 joǵary oqý oryndarynyń kitaphanalaryna jetkizip berdik. Barlyq memlekettik jáne jeke menshik oqý oryndaryn qamtydyq. Taǵy 23 oqýlyq aýdarylyp boldy. Olar baspaǵa daiyndalyp jatyr. Jyl sońyna deiin ol oqýlyqtar da joǵary oqý oryndaryna jetkizilip, osy jyly bul jobanyń qorytyndysy shyǵarylady», - deidi «Ulttyq aýdarma biýrosy» qoǵamdyq qorynyń jetekshisi Raýan Kenjehanuly.
Onyń aitýynsha, atalǵan oqýlyqtardy aýdarýǵa, daiyndaýǵa elimizdegi barlyq ulttyq ýniversitet mamandary keńinen qatysqan.
«Jalpy alǵanda 300-ge tarta ǵalymdar, redaktorlar, aýdarmashylar oqýlyqtardy aǵylshyn tilinen tikelei qazaq tiline aýdardy. Aýdarmashylar til biletin ǵana emes, sol pán boiynsha bilimi bar mamandar boldy. Tiliniń jatyq bolýy úshin ǵylymi, ádebi redaktorlar eńbek etti. Bul oqýlyqtar joǵary oqý oryndarynyń kafedralarynda talqylaýdan ótti. Osylaisha birneshe satydan turatyn sapany qamtamasyz etetin júie qalyptasty», - deidi ol.
