Byltyr orta bilim berý mekemelerindegi kitaphanalarǵa 2 mln-nan astam kórkem ádebiet satyp alyndy. Bul týraly Bilim jáne ǵylym ministri Ashat Aimaǵambetov málim etti, dep habarlaidy QazAqparat.
«Memlekettik tildi jetildirý máselesi ol týraly kontentpen de bailanysty. Ásirese kolledj jáne joǵarǵy oqý oryndaryn alsaq, qazaq tiline qatysty kontentke qatysty kemshilik kóp. Jetkilikti deńgeide ádebiet joq. Osyǵan bailanysty bilim týraly ulttyq jobada joǵaryda atalǵan máseleni bólek qarastyryp otyrmyz. Atap aitqanda, álemdik deńgeidegi shet tilderindegi ádebietterdi qazaq tiline aýdaryp, oqý barysynda qoldaný kerek. Bul jumysqa til komiteti kiristi, ol úshin qarjy qarastyrylǵan. Sonymen qatar búginde otandyq ǵalymdar kolledj jáne JOO arnalǵan qazaq tilindegi oqýlyqtar jazyp jatyr. Ásirese temir-tersektiń tilin qazaqshalaý asa mańyzdy», - dedi Aimaǵambetov «Memlekettik tildi ǵylym tiline ainaldyrý» atty dóńgelek ústel barysynda.
Sondai-aq, ministr balalardy kitap oqýǵa baýlityn arnaiy baǵdarlamanyń júzege asyp jatqanyn aitty.
«2021 jyly biz mektep kitaphalaryna 2 mln-nan astam kórkem ádebiet satyp aldyq. Balalar mektep kitaphanasyna barmaidy dep jatady. Eger kitaphanada jetkilikti deńgeide qyzyqty ári zamanaýi kitaptar bolmasa, árine balalardy tartý ońai emes. Qazaq tilin ǵylym tiline ainaldyrýǵa qatysty kelesi másele – terminologiia. Terminderge qatysty basty maqsat – birizdiliktiń bolýy. Sebebi keibir terminderdi ár jer ártúrli aýdaryp júr. Osy olqylyqty joiý kerek. Bul maqsatta bizdiń komitet jumysty bastap ketti. Terminologiiaǵa qatysty usynystaryńyz bolsa, qaraýǵa ázirmiz», - deidi ol.
