Tarih ǵylymynyń basty missiialarynyń biri – halyqty álemge tanytý. Tańdaýly eńbekterdiń aǵylshyn tiline aýdarylýyna memleket tarapynan qamqorlyq jasalýy tiis. Bul týraly QR Memlekettik hatshysy Qyrymbek Kósherbaev aitty, dep habarlaidy QazAqparat.
«Keiingi kezde qazaq tarihynyń qazaq tarihshylary kózimen zerttele bastaǵany, qazaq tarihynyń qazaqsha jazylyp júrgeni jaqsy úrdis. Sonymen birge, tarih ǵylymynyń basty missiialarynyń biri – halyqty álemge tanytý ekenin de esten shyǵarýǵa bolmaidy. Bul oraida orys tiline jazylyp nemese orys tiline aýdarylyp, keńesten keiingi keńistikke taraityn tarihi eńbekterdiń kúrt azaiyp ketkenine alańdaý bildirý jón. Olardyń tańdaýlylary aǵylshyn tiline aýdarylýyna da memleket tarapynan qamqorlyq jasalýy tiis. Birte-birte zertteýlerin tikelei aǵylshyn tilinde jazatyn ǵalymdardyń da shyǵatynyna kámil senemiz», - dedi Memlekettik hatshy belgili ǵalym, alashtanýshy Tursyn Jurtbaidyń 70 jyldyǵyna arnalǵan «Eldik ustanym jáne Táýelsizdik nysanasy» atty halyqaralyq konferentsiiada.
Qyrymbek Kósherbaev Memleket basshysy Qasym-Jomart Toqaevtyń da bul jóninde arnaiy aitqanyn, osyǵan bailanysty redaktsiia alqasyn quryp, jumys toptaryn jasaqtap, naqty merzimin belgilep, qarjylandyrý tetikterin jasap, tez arada iske kirisý qajettigin basa aitty.
«Resei ǵylym akademiiasynyń N. Miklýho-Maklai atyndaǵy etnologiia jáne antropologiia institýty «Narody i kýltýry» seriiasymen TMD keńistigindegi etnostarǵa arnalǵan kólemdi zertteý eńbekterin júieli túrde jariialap keledi. Ózimizge jaqyn túrkitildes halyqtardy atap ótsek, olardyń arasynda «Ýzbeki», «Kyrgyzy», «Bashikiri», «Tiýrkskie narody Kryma», «Tiýrkskie narody Sibiri», «Týrkmeny», «Tatary», «Azerbaidjantsy» tomdary jaryq kórgenin aita alamyn. Bul seriiamen 2019 jyly «Kazahi» atty kitaby da shyqty. Eger mamandar bul eńbektiń sapasyn jaqsy dep baǵalap jatsa, ony aǵylshyn tiline aýdarýdy da tiisti jolmen oilastyrǵan durys bolady. Jalpy aitqanda, Qazaqstan tarihy qaita qaraýdy, jan-jaqty zertteýdi qajet etedi. Al ony iske asyrý – tarihshylarymyzdyń basty mindeti, ortaq iske sáttilik tileimin», - dedi Memlekettik hatshy.
Buǵan deiin Qyrymbek Kósherbaev Qazaqstan tarihyn zertteýdegi keleli máselelerdi ataǵan edi.
