Buryn BAQ-ty tórtinshi bilik dese, qazir «BAQ - besinshi, altynshy bilik» degen uǵym paida boldy. Bul týraly elordada ótken qazaqtildi onlain kontent jasaýshylardyń IV forýmynda aityldy, dep habarlaidy QazAqparat.
«Buryn BAQ-ty tórtinshi bilik dese, qazir «BAQ - besinshi, altynshy bilik» degen uǵym paida boldy. Besinshi bilik - áleýmettik jeli bolsa, altynshy bilik - messendjer. Biz osynyń bárine beiimdele almai jatqan siiaqtymyz», - deidi Aidos Sarym.
Ol qazaq baspasózi ózin-ózi shektep kele jatqanyn aitty.
«Meniń oiymsha, qazaq baspasózi ózin-ózi shekteidi, ekinshiden bilikke táýeldi, úshinshiden qoǵamdyq pikirge táýeldi. Biz tek laik jinaityn, ózektiligi joq máseleler týraly jazamyz. Dástúrli baspasóz (gazet - avt.) internetpen jarysa almaityndyqtan, tereń saraptamalyq maqalalar jazýy kerek», - deidi ol.
Sondai-aq, ol qazaqtildi saittar bir-birine uqsap ketkenin aitty.
«Qazir qazaq baspasóziniń iisi de qalmaǵan siiaqty. Qazaq gazetteri de, saittary da bir-birine uqsap ketti. Bizdiń baspasózde saiasi reń paida bolyp, ońshyl gazetter, solshyl gazetter, orta taptyń máselesin kóteretin gazet, saittar paida bolsa deimin. Qazaq kóbinese solshyl qoǵam, bizge qazir ońǵa burylys kerek. Qoǵam arasynda jańa ideia, jańa pikirtalastarǵa jol ashý - óz qolymyzdaǵy nárse», - deidi saiasattanýshy.
