Biyl 1 qazan Qazaq radiosynyń áýe tolqynyna shyqqanyna 99 jyl, dep habarlaidy "Ult aqparat".
Alǵash 1921 jyldyń kúzinde Ult ustazy Ahmet Baitursynulynyń bastamasymen Orynbor qalasynan habar taratqan. Ǵasyr kýási bolǵan qara shańyraq, ár qoǵamnyń tusynda árqalai damyp, ýaqyt ótken saiyn zaman talabyna sai jańǵyrdy.
Qazir quramyna 4 birdei (Qazaq radiosy, Shalqar, Astana, Classic) radiony biriktirgen QAZAQ RADIOLARY seriktestigi búkil qazaq dalasyna aqparat taratady.
Qazaq radiosy pandemiiaǵa beiimdelip, eldiń áleýmettik, quqyqtyq taqyryptardaǵy qajetin óteýge birjolata den qoidy. Al Shalqar bolsa, taza ulttyq baǵyttaǵy tanym, tarih pen paiym-parasattyń ózegine ainaldy.
Qazir «Qazaq radiosy» respýblikanyń 89% aýmaǵyna tarasa, al «Shalqar» radiosyn eldiń 64% tyńdaidy. «Jol kartasyna» sáikes 2025 jylǵa qarai onyń deńgeiin 95%-ǵa jetkizý josparlanǵan. Qazir osy maqsatta shekaralyq aimaqtarda radiosignaldyń qamtý deńgeiin keńeitýge qatysty birqatar jumystar qolǵa alyndy.
Biyl 1 qazan kúni «Qazaq radiosynyń» qara orman halqyna arnaǵan ózindik syiy bar. Iaǵni, osy kúni Nur-Sultan jáne Almaty stýdiialarynan efirge shyǵatyn ardager diktorlardyń daýysy áýe tolqynynda qaita jańǵyrady. Satirik Kópen Ámirbek «Qaiyrly tańda» tyńdarmanǵa tamasha kóńil-kúi syilasa, barqyt únniń iesi Saýyq Jahanova «Jyrlaidy júrek» habaryn júrgizedi. Al Búrkit Bekmaǵambetov, Amanjan Eńsebaiuly jáne Ábdiráli Bólebai syndy diktorlar jańalyqtar jarshysy bolyp, elimizdegi jáne jahandaǵy sońǵy aqparatpen tanystyrady. Kúlásh Moldahmetova balalarǵa arnalǵan «Tapqyr bala» habaryn tikelei efirde júrgizse, Qusman Igisinov «Túrki álemi» baǵdarlamasyn daiyndaidy. Nurjan Muhamedjanova «Armandastar» habarynyń tizginin ustaidy. Radiomyzdyń taǵy bir top ardager jýrnalisteri «Dostyq», «Biz janbasaq», «Radiomeditsina», «Aq tilek» habaryn jurt nazaryna usynady.
«QAZAQ RADIOLARY» JShS Bas direktory Ernur Býrahannyń aitýynsha, «Qazaq radiosynyń» ǵasyrlyq mereitoiyn atap ótý – «saǵyndyrǵan daýys ieleri» aǵa býyn ókilderiniń osylaisha efirmen qaita qaýyshýymen bastalady.
