Qalam men qarýdy qatar ustap, qandy qyrǵynǵa qatysqandardyń ishinde qazaqtyń aqyn-jazýshylary az emes. Jeńis kúni qarsańynda maidanger aqyn-jazýshylardyń qalamynan týǵan shyǵarmalardy dáriptep, Altyn qordaǵy daýysyn tyńdarmanǵa jetkizý maqsatynda «Qazaq radiosy jańa joba usynbaq.
«Batyrlar rýhyna taǵzym» atty on kúndik baǵdarlamalar toptamasy aiasynda 1-10 mamyr aralyǵynda kún saiyn saǵat 17:45-te Qazaq radiosynyń áýe tolqynynan arnaiy habarlar beriledi.
«Batyrlar rýhyna taǵzym» habarynan qazaq qyzdarynyń arasynan shyqqan tuńǵysh ushqysh Hyiýaz (Hiýaz) Dospanovanyń, poeziia men soǵys qaharmany Hamit Erǵalievtiń, otty jyldardy óleńmen órgen Syrbai Máýlenovtiń, maidannyń aldyńǵy shebinde án salǵan Roza Baǵlanovanyń, qyryqqa jýyq kitap jazǵan soǵys ardageri Qalmuqan Isabaevtyń, Mánshúk jaily jyr avtory Ázilhan Nurshaiyqovtyń syr-suhbattaryn, soǵys jaily ózderi aitqan estelikterin tyńdai alasyzdar.
«Men qazaqpyn» dep jyrlaǵan Juban Moldaǵaliev pen áigili partizan Qasym Qaisenovtiń de erterekte Altyn qorǵa jazyp alynǵan ún taspalary áýe tolqynynan taratylady. Áigili «Soldat soǵysqa ketti» avtobiografiialyq romanynyń avtory, jazýshy, soǵys ardageri Kemel Toqaev týraly Ábilfaiyz Ydyrysovtyń Altyn qordaǵy esteligi men Ábý Sársenbaevtyń maidan jyrlary efirden berilip, batyrlarymyz tyńdarmanmen qaita qaýyshady.
«Jeńisti jaqyndatqan jandardyń erligin qurmettep, rýhyna taǵzym etý urapaqqa júktelgen zor mindet. Ekinshi dúniejúzilik soǵystyń aiaqtalǵanyna biyl 75 jyl. Osynsha ýaqyt ótse de qan maidannyń surapyl kúnderi talai júrekterde syzat qaldyryp, qanshama shańyraqty ortasyna túsirgeni eshqashan umytylmaidy. Soǵysqa attanǵan 1 million 200 otandasymyzdyń jartysyna jýyǵy urys dalasynda qaza tapty, elde qalǵandary tylda eńbek etti, 500-den astam qazaqstandyq Keńes odaǵynyń batyry atandy»,- delingen Qazaq radiolary taratqan aqparatta.
