Qazaq prozasy men poeziiasynyń antologiiasy álemniń 90-nan astam eline taratyldy. Bul týraly QR Prezidenti janyndaǵy Qoǵamdyq sanany jańǵyrtý baǵdarlamasyn iske asyrý jónindegi ulttyq komissiianyń keńeitilgen májilisinde QR Aqparat jáne qoǵamdyq damý ministri Aida Balaeva aitty, dep habarlaidy QazAqparat.
«100 jańa esim» jobasy negizinde óz salasynda Qazaqstannyń damýyna úles qosýshy 100 jańa tulǵa tańdalyp, kópshilikke tanystyryldy. Olardyń esimderimen tulǵalary keńinen nasihattalyp, óskeleń urpaqqa jaqsy úlgi-ónegege ainaldy. «100 jańa esim» jobasyna iriktelgen qairatker jastar óndiris pen kásipti, ǵylym men mádenieti alǵa tartatyn tulǵalardyń jańa legin quraidy dep sanaimyz», - dedi ministr.
Sonymen qatar ol «Jahandaǵy zamanaýi qazaqstandyq mádeniet» jobasy aiasynda «Qazirgi qazaq prozasynyń antologiiasy» jáne «Qazirgi qazaq poeziiasynyń antologiiasy» BUU-nyń 6 resmi tiline aýdarylyp, aǵylshyn, arab, ispan, qytai, orys jáne frantsýz tilderinde sóiletin 90-nan asa eldiń iri kitaphanalaryna, oqý oryndary men ádebi ortalyqtaryna, jalpy sany 20 myńǵa tarta uiymdarǵa jetkizilgendigin aitty.
«Bul jinaqtardy halyqaralyq tanystyrý is-sharalary London, Madrid, Parij, Máskeý jáne Kair qalalarynda ótti. Sondai-aq halyqaralyq qoǵamdastyqpen bailanysty shyǵaitý maqsatynda Qytai, AQSh, Túrkiia, Resei, Finliandiia, Koreia, Malaiziia, Vengriia, Shvetsiia jáne basqa da elderdiń ulttyq kitaphanalarynda 34 qazaqstandyq ádebiet jáne mádeniet ortalyǵy ashyldy. QR Prezidenti Qasym-Jomart Toqaevtyń tapsyrmasymen ótken jyly Abai Qunanbaiuylynyń 175 jyldyǵy aiasynda uly aqyn shyǵarmalarynyń jinaǵy álemniń iri 10 tiline aýdarylyp, álemge usynyldy. Bul bastama da tól ádebietimizdi álemge tanystyrý, mádenietimizdi nasihattaýǵa qosylǵan zor úles dep bilemin», - dedi Aida Balaeva.
