Qyrǵyzstannyń Osh qalasynda ótip jatqan II qazaq-qyrǵyz ziialylary forýmynda Halyqaralyq Túrki akademiiasynyń (TWESCO) qoldaýymen jaryq kórgen «Aitmatov. Imperiianyń sońǵy jazýshysy» atty kitap tanystyryldy, dep habarlaidy "Ult aqparat" akademiianyń baspasóz qyzmetine silteme jasap.
Shyńǵys Aitmatovtyń týǵanyna 90 jyl tolýyna orai ázirlengen kitaptyń avtory - Qyrǵyzstannyń memleket jáne qoǵam qairatkeri, ǵalym, ádebiet synshysy Osmankýn Ibraimov. Kitap Shyńǵys Tóreqululynyń ómiri men shyǵarmashylyǵyna arnalǵan. Avtor Shyńǵys Aitmatov tulǵasyn, jeke taǵdyry men ádebi shyǵarmashylyǵyn, saiasi kózqarastary men áleýmettik paiymdaryn HH ǵasyrmen tyǵyz bailanystyra sýrettegen. Ádette mundai tulǵalardy «dáýir-adam» dep te baǵalap jatady. Sondyqtan, kitap avtory Aitmatov shyǵarmashylyǵyn sipattai kele jazýshynyń Keńes Odaǵy kezindegi qoǵamdy, onyń qundylyqtary men birqatar erekshelikterin, sol dáýirdegi adam taǵdyryn sýrettegen sheberligine nazar aýdarǵan.
TWESCO-nyń qoldaýymen jaryq kórgen kitaptyń tusaýkeseri biyl kóktemde Astana qalasynda ótken «Aitmatov taǵylymy» atty birinshi qazaq-qyrǵyz ziialylary forýmynda uiymdastyrylǵan bolatyn. Keiin Bishkek qalasynda atalǵan kitaptyń tusaýkeseri uiymdastyrylǵan edi. Al, qazaq-qyrǵyz ziialylary II forýmynda kitapty Osh ýniversitetinde tanystyrýmen qatar, ony atalǵan oqý ornynyń kitaphanasyna tabys etý rásimi de ótti.
