Qazaqstannyń syrtqy ister ministrligi Qazaqstannyń Qyrǵyzstandaǵy elshiliginiń qyzmetkeri shekarada ustaldy degen aqparatty joqqa shyǵardy, - dep habarlaidy Sputnik Qazaqstan.
Keshe BAQ-ta qazaq-qyrǵyz shekarasynda Qazaqstannyń Qyrǵyzstandaǵy elshiliginiń ákimshilik-tehnikalyq personalynyń qyzmetkeri ustaldy degen aqparat taraǵan bolatyn. Ol alaiaqtyq jasady dep aiyptalǵan qazaqstandyq áieldi diplomatiialyq nómiri bar avtokólikpen shekaradan shyǵarmaq bolypty-mys.
Qazaqstannyń syrtqy ister ministrliginiń ókili Sputnik Qazaqstanǵa bul oqiǵadan habardar ekenin aitty. Alaida elshilik qyzmetkerin eshkim ustamaǵanyn naqtylady.
"10 qańtarda qyrǵyz tarapynda "Aq jol – Qordai" memlekettik shekarasynyń baqylaý-ótkizý pýnktinde Qazaqstannyń Qyrǵyzstandaǵy elshiliginiń ákimshilik-tehnikalyq personaly qyzmetkerimen bolǵan jaǵdaidy rastaimyz. Qazir qyrǵyz tarapymen birlesip bul oqiǵanyń mán-jaiyn anyqtap jatyrmyz", - dedi ministrliktiń resmi ókili Aibek Smadiiarov.
Aitýynsha, qazaq-qyrǵyz shekarasyndaǵy jaǵdai týraly tolyq maǵlumat keiinirek habarlanady.
