Elordadaǵy bes mektepke pilottyq joba retinde Qazaq kúresi sporty dene shynyqtyrý pánine engiziledi, dep habarlaidy QazAqparat.
«Ótken jyldyń qazan aiynda Qazaq kúresi federatsiiasynyń ókilderi federatsiianyń prezidenti qyzmetin maǵan senip tapsyrǵan bolatyn. Osy ýaqytqa deiin biz atqarylýy tiis sharýalar men sharalardy rettep, jumysty júieledik, jospar qurdyq. Soǵan sáikes, birqatar keshendi jobany iske asyrǵaly otyrmyz. Bizdiń negizgi maqsat – Qazaq kúresin álemdik deńgeige kóterý», - dedi Qazaqstan Respýblikasynyń Qazaq kúresi federatsiiasynyń prezidenti - Aqparat jáne qoǵamdyq damý ministri Dáýren Abaev OKQ-da ótken baspasóz máslihatynda.
Federatsiia prezidentiniń aitýynsha, osy maqsatta eń aldymen Qazaq kúresin mektep baǵdarlamasyna engizý jumysy qolǵa alynǵan.
«Qazirgi tańda Qazaq kúresiniń 100 saǵattyq oqý baǵdarlamasy daiyndaldy. Ol oqý baǵdarlamasynda kúrestiń álippesinen bastap ózindik sport túri retinde barlyq qyry, oqytý joldary qamtylǵan. Aldaǵy oqý jyly pilottyq joba retinde Nur-Sultan qalasynda bes mektepte dene shynyqtyrý pánderine Qazaq kúresi engiziledi. Álemniń kóptegen elinde ulttyq sport mindetti túrde mektepte oqytylady. Sol sebepti jumysty rettep alý úshin bastapqyda bes mektepke fakýltativti pilottyq joba retinde engizdik», - dedi Dáýren Abaev.
Óz kezeginde federatsiianyń bas hatshysy Baqdáýlet Sábitovtiń Qazaq kúresin mektep baǵdarlamasyna engizý bastamasy osydan úsh jyl buryn kóterilgenin eske saldy. Al Qazaq kúresin damytýdyń 2016-2021 jyldary damytý strategiiasynda 2020 jyly Qazaq kúresin mektep baǵdarlamasyna engizý jospary bolǵan.
«Birinshiden 5-11 synyp arasynda kásibi turǵyda daiyndaý josparlanýda. Al 1-4 synyp aralyǵynda Qazaq kúresiniń akrobatikalyq jattyǵýlaryn úiretý qarastyrylǵan. Qyzdar arasynda da, uldar arasynda da biz balýandardy daiyndaýǵa ázirmiz. Degenmen, ár oqýshynyń óz tańdaýy bar. Sol sebepti biz gimnastika federatsiiasymen kelistik. Iaǵni, balalardy qalaǵandary Qazaq kúresinen bólek gimnastikany úirene alady», - dedi ol.
