Elordadaǵy Ulttyq akademiialyq kitaphana Abai poeziiasynyń 130 jyldyǵyn atap ótti, dep habarlaidy "Ult aqparat".
Qazirgi kúntizbe boiynsha Abaidyń shynaiy týǵan kúni 23 tamyzǵa sáikes keledi. Ziialy qaýym osy kúndi toilap jatqanda Ulttyq akademiialyq kitaphana Abai poeziiasynyń 130 jyldyǵyna arnalǵan dóńgelek ústel ótkizdi.
Aqyn, abaitanýshy Almahan Muhamedqaliqyzynyń sózine qaraǵanda, osydan 130 jyl buryn Abaidyń 10 óleńi el arasyna óz atynan taraǵan.
«Biyl Abaidyń 10 óleńine 130 jyl tolady. Atap aitsaq, «Esińde bar ma jas kúniń», «Júregim meniń qyryq jamaý», «Adam bir boq kótergen boqtyń qaby», «Kúshik asyrap it ettim», «Súisine almadym, súimedim», «Dútbaiǵa», «Nurly aspanǵa tyrysyp óskensiń sen» atty óleńderi men M.Lermontovtan aýdarǵan «Jalaý», «Jartas», «Júrekte kóp qazyna bar, bári jaqsy» siiaqty týyndylary jaryq kórgen», - deidi ǵalym.
Aitýly sharaǵa abaitanýshy Mekemtas Myrzahmetov, QR Jazýshylar odaǵynyń tóraǵasy Ulyqbek Esdáýlet, filosof Ǵarifolla Esim, Jazýshylar odaǵynyń Nur-Sultan qalalyq filialynyń direktory Dáýletkerei Kápuly bastaǵan ǵalymdar men ádebiet ókilderi qatysty.
Jiynda sóz alǵan ǵalym Mekemtas Myrzahmetov qazaq qoǵamy Abaidy jattaý jaǵynan aldyna jan salmai ketkenimen, tolyq túsinbei jatqanyn aitty.
«Abaidy jattaý bar da, túsiný bar. Jattaýdan aldymyzǵa jan salmai júrsek te, kóbinese túsinbei qalamyz. Onyń sebebi kóp. Abaidyń rýhani álemi men pálsapalyq lirikasyna Eýropa da, Shyǵys ta jete almaǵan. Qazir álemdik dúnietanym ózgerdi. Abaidan qalǵan «Tolyq adam ilimi» deitin bir uly mura bar. Qazir osy ilim Qazaqstandaǵy 8 ýniversitette oqytylyp jatyr. Sonyń monografiiasyn jazyp bitirdim. Túbi bul ilimdi búkil álem zerttep, oqityn bolady. Sebebi ondai tereń ilim Eýropada da, myna irgedegi Qytaida da joq», - dedi abaitanýshy.
