Foto: QR MAM
2025 jylǵy 3-7 maýsym aralyǵynda Qytaidyń Chýntsin qalasyna qarasty Iýnchýan aýdanynda Shanhai yntymaqtastyq uiymyna múshe elderdiń halyqaralyq kinofestivali ótýde, dep habarlaidy Ult.kz.
Aýqymdy mádeni shara ShYU elderi arasyndaǵy gýmanitarlyq bailanystardy tereńdetip, kino salasyndaǵy yntymaqtastyqty nyǵaitýdy maqsat etedi.
Festivalge Qazaqstan tarapynan Mádeniet jáne aqparat ministrligi, Ulttyq kinony qoldaý memlekettik ortalyǵy, Sh.Aimanov atyndaǵy «Qazaqfilm» kinostýdiiasy jáne elimizdiń tanymal prodiýserleri men rejisserlerinen quralǵan delegatsiia qatysyp jatyr.
Biylǵy «Altyn Kameliia» baiqaýyna 10 elden 20 film usynylǵan. Qazaqstan atynan eki týyndy – «Nabat operatsiiasy» jáne «Aǵaiyndylar» filmderi kórsetilýde. «Nabat operatsiiasy» – rejisser Rashid Súleimenovtiń shynaiy oqiǵaǵa negizdelgen dramasy. Film quqyq qorǵaý organdary júrgizgen arnaiy operatsiiany arqaý etken. Bul kartina «Qazaqfilm» stýdiiasynda, Mádeniet jáne aqparat ministrligi men Ulttyq kino ortalyǵynyń qoldaýymen túsirilgen.
Al rejisser Darhan Tólegenovtiń «Aǵaiyndylar» filmi buǵan deiin 15-ten astam halyqaralyq júldege ie bolǵan. Atap aitqanda, Germaniiadaǵy Oldenburg halyqaralyq kinofestivalinde Spirit of Cinema marapatyn jeńip alǵan. Filmdi Golden Man Media stýdiiasy túsirgen.
Festivaldiń qazylar alqasyna ShYU quramyndaǵy elderden 9 bedeldi kino mamany engen. Qazaqstan atynan prodiýser Tasbolat Merekenov qazylar qatarynda. Qazylar alqasynyń tóraǵasy — Qytaidyń belgili prodiýseri ári stsenaristi Jen Chjýnlýn.
Júldeler on atalym boiynsha tabystalady, sonyń ishinde «Úzdik film», «Úzdik rejisser», «Úzdik stsenarii» jáne úzdik akterlik jumys sekildi nominatsiialar bar.
Kinofestival aiasynda 11 negizgi is-shara ótkiziledi. Olardyń qatarynda baiqaý filmderiniń kórsetilimi, kinoforýmdar, kinotehnologiialar kórmesi jáne saltanatty Gala-kontsert bar.
