Búgin QR Memlekettik hatshysy Qyrymbek Kósherbaevtyń qatysýymen QR UǴA akademigi, tarih ǵylymdarynyń doktory, professor Orazaq Smaǵulovtyń «Qazaq halqy men onyń ata tegine orai antropologiialyq ocherkter» atty kitabynyń tusaýkeseri ótti, dep habarlaidy QazAqparat Aqordanyń baspasóz qyzmetine silteme jasap.
Shara Halyqaralyq Túrki akademiiasynyń jańa ǵimaratynda uiymdastyryldy.
Túbi bir týysqan túrki halyqtardyń tarihy, tili, ádebieti, qazynaly murasynyń zerttelýine, zaman talabyna sai jańǵyrýyna úlken úles qosyp kele jatqan akademiia jańa ǵylymi eńbektiń shyǵýyna muryndyq bolǵan.
Memlekettik hatshy óz sózinde bul jinaq – shejireli tarihymyzdy túgendep, týysqandyq júiemizdi zerdelegen tolymdy týyndy ekenin atap ótti.
– Bul eńbek el shejiresi men jer shejiresiniń úndestigin aishyqtaýymen, qasietti jerimizdiń aýmaqtyq tutastyǵy el-jurtymyzben kindiktes ekenin aiǵaqtaýymen, ulttyq qaýipsizdigimiz ben memlekettik múddemizge rýhani qorǵan qyzmetin atqarýymen asa qundy, – dedi Qyrymbek Kósherbaev.
Irgeli zertteý QR Prezidenti Qasym-Jomart Toqaevtyń alǵysózimen, qazaq, orys, túrik, aǵylshyn tilderinde jaryqqa shyqty.
Munda jurtymyzdyń bes myń jyldyq násildik teginiń ulanǵaiyr dalamen tyǵyz sabaqtastyqta ekendigin dáleldeitin ǵylymi dáiekter keltirilgen.
Sondai-aq halqymyzdyń násildik jelisin, týysqandyq órisin keshendi saralaǵan ǵylymi eńbekte, baýyrlas elderdiń atatek tarihy, týysqandyq bailanystary jaiynda tyń derekter de bar.
