QR Ekologiia, geologiia jáne tabiǵi resýrstar ministri Maǵzum Myrzaǵaliev Qazaqstan munaishylaryn kásibi merekemen quttyqtady, dep habarlaidy QazAqparat.
«Barsha munai-gaz salasy ardagerlerin, jumysshylaryn Qazaqstan munaiynyń 120-jyldyǵymen jáne kásibi merekelerimen quttyqtaimyn!» - dep jazdy ministr Twitter-de.
Sondai-aq sala qyzmetkerlerin «QazMunaiGaz» UK» AQ Basqarma tóraǵasy Alik Aidarbaev quttyqtady. Kompaniiadan málim etkendei, Mańǵystaý oblysynyń Jańaózen jáne Aqtaý qalalarynda merekege orai saltanatty sharalar ótti.
«Táýelsizdik alǵaly beri munai-gaz salasy jańa kezeńge qadam basyp, óndiris órge órledi. Salany aiaqqa turǵyzyp, ilgeri damytýda Tuńǵysh Prezident N.Nazarbaevtyń orny bólek. Elbasynyń qajyrly eńbegi men saiasi jigeriniń arqasynda eńsemizdi tik kóterip, talai biikterdi baǵyndyrdyq. Byltyr Qazaqstanda 90 million tonna munai óndirildi. Jiyrma segiz jylda «qara altyndy» óndirý kólemi 3 eseden astamǵa ulǵaidy. Búgingi tańda elimiz munai men gaz óndirisi boiynsha dúniejúzinde 13-shi orynda tur. Eń bastysy – munaishylardyń ál-aýqaty jaqsardy. Ótken jyldar men búgingi kúnniń áleýmettik-eńbek jaǵdaiyn múldem salystyrýǵa bolmaidy», - dedi Alik Aidarbaev.
Aita keteiik, munai-gaz kesheni qyzmetkerleri kúni jyl saiyn qyrkúiek aiynyń alǵashqy jeksenbisinde atalyp ótedi. Kásibi mereke 2003 jyly bekitilgen bolatyn. Biyl qazaqstandyq munaishylar úshin erekshe jyl. Munai-gaz salasy 120 jyldyq mereitoiyn atap ótýde.
Eske salaiyq, 1899 jyly Atyraý oblysyndaǵy Qarashúńgil ken ornynda alǵashqy munai burqaǵy atqylaǵan bolatyn. Otandyq munai-gaz salasynyń tarihy sol sátten bastaý alady.
