Qazaqstan Respýblikasy men Birikken Arab Ámirlikteriniń suńqarlar popýliatsiiasyn saqtaýda birlese atqarǵan jumysy óz jemisin berip otyr. Jýyqta qazaq dalasyna alpys segiz jabaiy suńqar jiberildi. Bul týraly WAM agenttigi jazady.
Kezinde Qazaqstannyń túkpir-túkpirinde qaptai ushatyn suńqarlar ókinishke qarai qorshaǵan orta men adami faktorlardyń saldarynan búgingi tańda quryp ketýdiń aldynda tur. Osy sebepti eki eldiń ókilderi Qazaqstanda qustyń atalmysh túrin saqtap qalý maqsatynda kúsh biriktirdi. Suńqarlardy erkindikke jiberýdi kózdeitin bul seriktestik Birikken Arab Ámirlikterindegi Sheih Zaidtyń Qory men Qazaqstan Respýblikasynyń Qorshaǵan orta jáne sý resýrstary ministrliginiń arnaiy baǵdarlamasy aiasynda júzege asyrylyp jatyr.
Qazaqstannyń dalasyna suńqarlardyń jiberilgenin jariia etken Abý-Dabidegi qorshaǵan orta boiynsha agenttiktiń basqarýshy direktory Muhamed ál-Babari qordyń atynan sóz sóilep, Abý-Dabidiń suńqarlardyń popýliatsiiasyn saqtaýda kúsh salyp jatqanyn, suńqardyń kóptegen halyq úshin tarihi jáne mádeni mańyzy baryn, ásirese suńqar QR men BAÁ úshin mańyzdy simvol ekenin atap ótti.
Onyń aitýynsha, tabiǵatta suńqarlardyń popýliatsiiasyn kúsh biriktirý arqyly ǵana saqtap qalýǵa bolady.
68 suńqar qutqarylyp, Ábý-Dabidegi arnaiy klinikada kútimde bolǵan. Odan keiin QR Qorshaǵan orta jáne sý resýrstary ministrliginiń jiti baqylaýymen qor arqyly bostandyqqa jiberilgen. Qustardy erkindikke ushyrý áleýetti oryndar jiti zerttelgennen keiin ǵana júrgizilgen. Qazaqstannyń geografiialyq ornalasýy men topologiiasy suńqarlardy jiberýde teńdessiz oryn bolyp tabylady.
12 qusqa spýtniktik qurylǵylar bekitildi. Olar suńqarlardyń ushý traektoriiasyn anyqtap, ǵylymi málimetterdi jinaýǵa septigin tigizedi. Bul qordyń baǵdarlamasyn basqarýǵa jáne suńqarlardyń Qazaqstanda jáne ózge elderde ómir súrip ketýin jaqsartýǵa jol ashady. BÁA-nyń negizin qalaýshy, qaitys bolǵan sheih Zaid ibn Sultan ál Nahaiian qurǵan qor qurylǵannan bastap 1995 jylǵa deiin 1800 suńqardy ártúrli elderge ushyrǵan (sonyń ishinde Pákistan, Qyrǵyzstan jáne Qazaqstan bar).
Suńqarlardyń popýliatsiiasyn saqtaý salasyndaǵy kóshbasshy retinde Ábý-Dabi álemde birinshi bolyp suńqarlardy ońaltatyn klinika ashqan. Sonymen qatar, Ámirlikte suńqarlardyń barlyq túrlerin saýdalaýdy litsenziialaýǵa qatań júie engizilgen.
