Indoneziianyń Djakarta jáne Palembang qalalarynda uiymdastyrylǵan XVIII jazǵy Aziia oiyndarynda qazaq boksshylaryna altyn buiyrmady. Buiyrmady dep aitqanymyz durys shyǵar. Sebebi biylǵy jarysta aýyr salmaqtaǵy boksshylar baq synaǵan joq. Tóreshilerdiń de bura tartqan tustary boldy.
Qazaqstandyq sportshylar jazǵy Aziia oiyndaryna 1994 jyldan beri qatysyp keledi. Sodan bergi aralyqta boksshylarymyz sary qurlyqtyń basty dodasynan jeńimpaz atanbai qaitqan sátteri bolmaǵan. Atap aitar bolsaq, elimiz alǵash qatysqan Hirosimadaǵy jarysta Nurjan Smanov (67 kg) pen Qanatbek Shaǵataev (71 kg) jeńistiń eń biik tuǵyrynan kórindi. Araǵa 4 jyl sala Bangkokta ótken Aziia oiyndarynda qazaq boksshylary 3 altyn medal enshiledi. Ermahan Ibraimov (71 kg), Viacheslav Býrba (75 kg) men Muhtarhan Dildábekov (+91 kg) top jardy.
2002 jylǵy Aziia oiyndary Pýsanda ótti. Bul jarysta Nurjan Kárimjanov (64 kg) pen Gennadii Golovkin (71 kg) altynnan alqa taqty. 2006 jyly Dohada bir boksshymyz ǵana jeńimpaz atandy. Ol – Baqyt Sársekbaev (69 kg) edi.
Gýanchjoýda (2010 jyl) qazaq boksshylary eki altyn aldy. Birin – Serik Sápiev (69 kg), ekinshisin Daniiar Eleýsinov (64 kg) enshiledi.
2014 jyly Inchhonda ótken Aziia oiyndary qazaq boksshylary úshin asa tabysty boldy. 6 birdei bylǵary qolǵap sheberimiz azýyn aiǵa biledi. Daniiar Eleýsinov (69 kg) Aziia oiyndarynda eki ret qatarynan top jarǵan alǵashqy boksshy atandy. Iliias Súleimenov (52 kg), Jánibek Álimhanuly (75 kg), Ádilbek Niiazymbetov (81 kg), Anton Pinchýk (91 kg) pen Ivan Dychko (+91 kg) jeńimpaz atanyp, qazaq eliniń abyroiyn asyrdy. Boksshylarymyz buryn-sońdy bolmaǵan biik belesti baǵyndyrdy.
Biylǵy Aziia oiyndarynda boksshylarymyzdyń joly bolmady. Sondai-aq aýyr salmaq dárejesi alynyp tastaldy. Bul da júlde alatyn jolymyzdy bógedi. Eki boksshymyz ǵana finalǵa shyqty.
75 kg-ǵa deiingi salmaqta Ábilhan Amanqul Aziia oiyndarynyń jeńimpazy atana almady. Ashylý saltanatynda Qazaqstannyń týyn kóterip shyqqan boksshy finalda ózbek boksshysy Israil Madrimovqa jol berdi. Tóreshiler 3:2 (27:28, 27:28, 28:27, 29:26, 28:27) esebimen qarsylasyn jeńimpaz dep tanydy. Aziia oiyndaryna alǵash qatysqan Ábilhannyń júldesi altyn bolmady, kúmis boldy.
Qazaqtyń salmaǵy atanyp ketken 69 kg-ǵy altyndy da ózbekter "óńgerip" ketti. Ókinishti-aq... Tóreshiler 3:1 esebimen ózbek boksshysy Baba Ýsmon Batýrovqa jeńisti syilady. Aziia oiyndarynda 2006 jyldan beri bul salmaqta qazaq boksshylary atoi salyp kelgen edi. Amal qansha?... Kelesi Aziia oiyndary oralǵansha...
Aziia oiyndaryndaǵy boks básekesi sońynan ulttyq quramanyń bas jattyqtyrýshysy Myrzaǵali Aitjanov ádiletsizdik kóp bolǵanyn aityp, aǵynan jaryldy. Bul týraly QR UOK resmi saityna bergen suhbatynda aita ketti.
- Aziia oiyndaryna bes júlde alamyz dep kelgenbiz. Oǵan shamamyz da jetetin edi. Alaida, tym tómen nátije kórsetip otyrmyz. Ár el óz sportshysyn qorǵaidy. Sol sebepti, bir eldiń sońyna túsip alǵanymyz durys bolmas. Jigitter bar kúshin saldy, olarǵa aitarym joq. Kóptegen kedergiler men keleńsiz jaittar oryn alyp otyr. Finalǵa deiin úsh boksshymyzdyń jolyn kesken. Endi, mine, eki jigitimizdiń altynyn tartyp aldy. Sabyr qylǵannan basqa amal joq.
Jalpy, bizge sharshy alańdaǵy qarsylastarmen ǵana emes, basqalarmen de kúresýge týra keldi. Qairat Erálievti alyp tastaǵannan keiin-aq, qiyn soǵaryn sezdim. Tipti, Aziia oiyndaryna attanar kezde de bul belgili bolǵan. Sebebi, bizdiń bir ókilimiz joq. Qazaqstandyq tóreshiler de alynbaǵan. Sondyqtan Aziia oiyndarynda saiasat jeńdi.
Aslanbek Shymbergenovke joq jerden eskertý berip, upaiyn alyp tastady. Boksshyǵa úsh-tórt ret aýyzsha eskertý berilgen soń ǵana, upaiyn alyp tastaýshy edi. Bul joly birden...
Jigitterge aitar ókpem joq. Bar kúshin saldy, - dedi Myrzaǵali Aitjanov.
